మెగాస్టార్ చిరంజీవి(Chiranjeevi) వెండితెరపై కనిపిస్తేనే ఆ పూనకం వేరు.. ఇక ఆయన మళ్ళీ పాత రోజులను గుర్తుకు తెస్తూ ఒక సోషియో ఫాంటసీ సినిమాతో వస్తున్నారంటే అంచనాలు ఏ స్థాయిలో ఉంటాయో ప్రత్యేకంగా చెప్పక్కర్లేదు. గత కొన్నాళ్లుగా సోషల్ మీడియాలో 'విశ్వంభర' విడుదల తేదీ గురించి రకరకాల ఊహాగానాలు వినిపిస్తున్నాయి. వాటన్నింటికీ ఫుల్ స్టాప్ పెడుతూ, చిత్ర యూనిట్ ఒక క్రేజీ అప్‌డేట్‌తో సిద్ధమైనట్లు ఫిలిం నగర్ టాక్.

అత్యున్నత సాంకేతిక విలువల కోసం ఎంత సమయమైనా వెచ్చించేందుకు వెనకాడని దర్శకుడు వశిష్ట(Vassishta), ఈ సినిమాను విజువల్ వండర్‌గా తీర్చిదిద్దుతున్నారు. నిజానికి ఈ పాటికే థియేటర్లలో సందడి చేయాల్సిన ఈ భారీ చిత్రం, గ్రాఫిక్స్ పనుల కారణంగా వాయిదా పడుతూ వచ్చింది. అయితే, క్వాలిటీ విషయంలో ఎక్కడా రాజీ పడకూడదని నిర్ణయించుకున్న మేకర్స్, ఎట్టకేలకు జూలై 10ని విడుదల తేదీగా లాక్ చేసినట్లు తెలుస్తోంది. వేసవి సెలవుల సందడి ముగిసిన వెంటనే, మెగా ఫ్యాన్స్‌కు అసలైన బాక్సాఫీస్ ట్రీట్ మొదలుకానుంది.

ప్రస్తుతం చివరి దశ పనులు వేగంగా జరుగుతుండటంతో, త్వరలోనే మేకర్స్ ఒక పవర్‌ఫుల్ టీజర్ ద్వారా ఈ డేట్‌ను అధికారికంగా ప్రకటించనున్నారు. మెగాస్టార్ ఇమేజ్‌కు తగ్గట్లుగా ఈ భారీ బడ్జెట్ చిత్రాన్ని యూవీ క్రియేషన్స్ అత్యంత ప్రతిష్టాత్మకంగా నిర్మిస్తోంది. విభిన్నమైన లోకాలు, మంత్రముగ్ధులను చేసే విజువల్స్, చిరు ట్రేడ్ మార్క్ యాక్షన్ అన్నీ కలగలిపి 'విశ్వంభర'(Vishwambhara) రూపొందుతోంది. సంక్రాంతి బరి నుంచి తప్పుకున్నప్పటికీ, జూలై నెలలో సోలో రిలీజ్ ద్వారా బాక్సాఫీస్ వద్ద భారీ వసూళ్లను రాబట్టాలని మేకర్స్ ప్లాన్ చేస్తున్నారు. మరి ఈ విశ్వంభర ప్రయాణం థియేటర్లలో ఏ స్థాయి సంచలనం సృష్టిస్తుందో చూడాలి.