అమరావతి: ఆంధ్రప్రదేశ్(Andhra Pradesh)రాజకీయ ముఖచిత్రంలో శుక్రవారం ఒక కీలక ఘట్టం ఆవిష్కృతం కాబోతోంది. రాజధాని అమరావతి వేదికగా ముఖ్యమంత్రి అధ్యక్షతన జరగనున్న క్యాబినెట్ సమావేశం రాష్ట్ర భవిష్యత్తుకు దిశానిర్దేశం చేయనుంది. ముఖ్యంగా పార్లమెంట్‌లో అమరావతి రాజధాని చట్టానికి ఆమోద ముద్ర పడిన తర్వాత జరుగుతున్న తొలి భేటీ కావడంతో, సర్వత్రా ఉత్కంఠ నెలకొంది. ఈ చారిత్రాత్మక నిర్ణయానికి సహకరించిన ప్రధాని మోదీకి, కేంద్ర ప్రభుత్వానికి కృతజ్ఞతలు తెలుపుతూ క్యాబినెట్ తీర్మానం చేయడమే కాకుండా, రాజధాని నిర్మాణ పనుల వేగంపై కీలక ప్రకటన చేసే అవకాశం ఉంది.

ఈ సమావేశంలో అత్యంత ఆసక్తికరమైన అంశం రాష్ట్రానికి రాబోతున్న భారీ పెట్టుబడులు. 16వ SIPB సమావేశంలో ప్రతిపాదించిన సుమారు 31 మెగా ప్రాజెక్టులకు క్యాబినెట్ గ్రీన్ సిగ్నల్ ఇవ్వనుంది. మొత్తం రూ.39,436 కోట్ల పెట్టుబడులను ఆమోదించడం ద్వారా ఏపీని పారిశ్రామిక హబ్‌గా మార్చేందుకు ప్రభుత్వం సిద్ధమైంది. ఈ ప్రాజెక్టులు పట్టాలెక్కితే రాష్ట్రవ్యాప్తంగా వేలాది మంది యువతకు ఉపాధి అవకాశాలు లభించనున్నాయి. ముఖ్యంగా హైటెక్ రంగంలో రాష్ట్రాన్ని అగ్రపథాన నిలిపేందుకు అమరావతిలోని 'క్వాంటమ్ వ్యాలీ'లో మూడు అగ్రశ్రేణి సంస్థల ఏర్పాటుకు ప్రభుత్వం మొగ్గు చూపుతోంది.

కేవలం పారిశ్రామిక ప్రగతే కాకుండా, సామాన్యుల సమస్యలపై కూడా ప్రభుత్వం దృష్టి సారించింది. ప్రైవేట్ విద్యా సంస్థల్లో ఇష్టారాజ్యంగా పెరుగుతున్న ఫీజులకు అడ్డుకట్ట వేసేందుకు 'ఫీజు రెగ్యులేటరీ కమిటీ' (FRC) ఏర్పాటుకు సంబంధించిన ఆర్డినెన్స్‌ను క్యాబినెట్ ఆమోదించనుంది. ఇది మధ్యతరగతి తల్లిదండ్రులకు పెద్ద ఊరటనిచ్చే నిర్ణయం కానుంది. విద్యను వ్యాపారం కాకుండా, సామాన్యుడికి అందుబాటులో ఉంచడమే లక్ష్యంగా ఈ కీలక చట్టాన్ని తీసుకురాబోతున్నారు.

రాజధాని భూముల కేటాయింపులు, మౌలిక సదుపాయాల కల్పనపై కూడా ఈ భేటీలో సమగ్రంగా చర్చించనున్నారు. అమరావతి(Amaravati)ని అంతర్జాతీయ స్థాయిలో ప్రమోట్ చేయడంతో పాటు, ఆగిపోయిన పనులను పరుగులు పెట్టించేందుకు ప్రత్యేక ప్రణాళికను సిద్ధం చేస్తున్నారు. మొత్తానికి, శుక్రవారం ఉదయం 10.30 గంటలకు సచివాలయంలో మొదలయ్యే ఈ భేటీ తర్వాత ఏపీ రూపురేఖలు మారబోతున్నాయనే చర్చ రాజకీయ వర్గాల్లో జోరుగా సాగుతోంది.