సౌత్ ఇండియన్ సినిమా, కార్పొరేట్ ప్రపంచంలో ఇప్పుడు ఎక్కడ చూసినా ఒకే ఒక్క ఆసక్తికరమైన చర్చ నడుస్తోంది. టాలీవుడ్, కోలీవుడ్‌లలో తనదైన మ్యూజిక్‌తో కోట్లాది మంది యూత్‌ను ఊర్రూతలూగిస్తున్న రాక్‌స్టార్ అనిరుధ్ రవిచందర్.. సన్ గ్రూప్ అధినేత కళానిధి మారన్ తనయ, సన్‌రైజర్స్ హైదరాబాద్ (SRH) సీఈఓ కావ్య మారన్‌(Kavya Maran)తో ఏడడుగులు వేయబోతున్నారు. గత కొంతకాలంగా వీరిద్దరి మధ్య ఏదో నడుస్తోందంటూ సోషల్ మీడియాలో రకరకాల ఊహాగానాలు చక్కర్లు కొట్టగా.. తాజాగా వస్తున్న పరిణామాలు ఆ వార్తలకు బలం చేకూర్చడమే కాకుండా, డేట్స్ కూడా ఖరారైనట్లు స్పష్టం చేస్తున్నాయి.

ఈ హై-ప్రొఫైల్ పెళ్లికి సంబంధించిన ముఖ్యమైన ఘట్టం విదేశీ గడ్డపై అత్యంత నిశ్శబ్దంగా జరగనున్నట్లు తెలుస్తోంది. విశ్వసనీయ వర్గాల సమాచారం ప్రకారం.. నవంబర్ 11న గ్రీస్(Greece) వేదికగా అత్యంత సన్నిహితులు, కుటుంబ సభ్యుల సమక్షంలో ఈ డెస్టినేషన్ వెడ్డింగ్ జరగనుంది. మీడియా హడావుడి లేకుండా, కేవలం అత్యంత ఆప్తమిత్రుల మధ్య ఈ వివాహ తంతును పూర్తి చేయాలని ఇరు కుటుంబాలు నిర్ణయించుకున్నట్లు సమాచారం.

అయితే, వివాహం విదేశాల్లో సింపుల్‌గా ముగిసినప్పటికీ.. టాలీవుడ్, కోలీవుడ్ సినీ దిగ్గజాలు, రాజకీయ ప్రముఖులు, బిజినెస్ టైకూన్‌ల కోసం చెన్నై వేదికగా ఒక అట్టహాసమైన రిసెప్షన్ ప్లాన్ చేశారు. నవంబర్ 21న జరగనున్న ఈ గ్రాండ్ రిసెప్షన్‌కు సంబంధించిన ఏర్పాట్లు ఇప్పటికే ప్రారంభమైనట్లు తెలుస్తోంది. తాజాగా తెలంగాణ ముఖ్యమంత్రి రేవంత్ రెడ్డి(CM Revanth Reddy)కి కావ్య మారన్ తల్లిదండ్రులు స్వయంగా ఈ వేడుకకు ఆహ్వానం అందించడం, ఈ వార్తలను నిజమని నిరూపించడానికి తిరుగులేని సాక్ష్యంగా నిలిచింది. సీఎం స్థాయి వ్యక్తికి స్వయంగా ఆహ్వానం అందడంతో ఈ పెళ్లి న్యూస్ క్షణాల్లో వైరల్ అయింది.

ఈ జోడీకి సంబంధించి మరో ఆసక్తికరమైన అంశం వారిద్దరి రేంజ్. ఒకవైపు మ్యూజిక్ ఇండస్ట్రీలో తిరుగులేని విజయాలతో దూసుకుపోతున్న అనిరుధ్(Anirudh Ravichander) నికర ఆస్తుల విలువ దాదాపు రూ. 50 నుంచి రూ. 60 కోట్ల వరకు ఉంటుందని అంచనా. ఇక మరోవైపు బిజినెస్ రంగంలో తనకంటూ ప్రత్యేక ముద్ర వేసుకున్న కావ్య మారన్.. సన్ టీవీ నెట్‌వర్క్ ఎగ్జిక్యూటివ్ డైరెక్టర్‌గా, ఎస్‌ఆర్‌హెచ్ కో-ఓనర్‌గా సుమారు రూ. 400 నుంచి రూ. 500 కోట్ల విలువైన వ్యాపార సామ్రాజ్యానికి అధిపతిగా ఉన్నారు. ఈ లెక్కన వీరిద్దరి ఉమ్మడి సంపద రూ. 500 కోట్లకు పైమాటే కావడం విశేషం. సంగీతం, వ్యాపారం అనే రెండు భిన్నమైన రంగాలు ఒక్కటవుతున్న ఈ అరుదైన కలయిక ఇప్పుడు సౌత్ ఇండియాలో హాట్ టాపిక్‌గా మారింది. అయితే, ఈ వార్తలపై అటు అనిరుధ్ కానీ, ఇటు కావ్య మారన్ కానీ ఇప్పటివరకు ఎలాంటి అధికారిక ప్రకటన చేయలేదు. అయినప్పటికీ, పెళ్లి తేదీలు బయటకు రావడంతో ఇరు కుటుంబాల అభిమానులు సోషల్ మీడియాలో ఇప్పుడే శుభాకాంక్షలు తెలియజేస్తూ ట్రెండ్ చేస్తున్నారు.