ఆంధ్రప్రదేశ్(Andhra Pradesh) మాజీ ముఖ్యమంత్రి, వైఎస్సార్ కాంగ్రెస్ పార్టీ అధినేత వైఎస్ జగన్ మోహన్ రెడ్డికి న్యాయపరంగా మరో భారీ ఎదురుదెబ్బ తగిలింది. దశాబ్ద కాలానికి పైగా నానుతున్న అక్రమాస్తుల కేసుల వ్యవహారం ఇప్పుడు ఒక్కసారిగా మళ్లీ వేడెక్కింది. జగన్ మోహన్ రెడ్డి చుట్టూ ఉన్న చట్టపరమైన కేసుల్లో విచారణ వేగాన్ని పుంజుకునేలా ఎన్‌ఫోర్స్‌మెంట్ డైరెక్టరేట్ (ఈడీ) వేసిన అడుగులు ఇప్పుడు తెలుగు రాష్ట్రాల రాజకీయంలో పెద్ద దుమారమే రేపుతున్నాయి.

ఈడీ తాజాగా తెలంగాణ హైకోర్టు(Telangana High Court) తలుపు తట్టడమే ఈ సంచలనానికి కారణమైంది. జగన్ అక్రమాస్తులకు సంబంధించి దాఖలైన కేసుల్లో సుదీర్ఘకాలంగా ఎలాంటి పురోగతి లేకపోవడంపై ఈడీ తీవ్ర అసంతృప్తి వ్యక్తం చేసింది. గత పదేళ్లుగా సీబీఐ ప్రత్యేక కోర్టులో దాదాపు తొమ్మిది చార్జిషీట్లు అలానే పెండింగ్‌లో ఉండిపోవడాన్ని ఈడీ ఉన్నత న్యాయస్థానం దృష్టికి తీసుకెళ్లింది. ఈ కేసుల్లో ఇకపై ఆలస్యం చేయకుండా రోజువారీ ప్రాతిపదికన (డైలీ బేసిసిస్) విచారణ జరిపేలా ప్రత్యేక కోర్టును ఆదేశించాలని అత్యున్నత దర్యాప్తు సంస్థ గట్టిగా కోరింది.

ఈ కేసుల విచారణ ఇంతకాలం ఆగిపోవడానికి నిందితుల వైపు నుంచి దాఖలైన డిశ్చార్జ్ పిటిషన్లే ప్రధాన కారణమని ఈడీ తన పిటిషన్‌లో స్పష్టం చేసింది. డిశ్చార్జ్ అర్జీలు ఏళ్ల తరబడి తేలకపోవడంతో అసలు విచారణ ప్రక్రియ ముందుకు సాగడం లేదని వెల్లడించింది. అంతేకాకుండా, ఈ విచారణకు జగన్ మోహన్ రెడ్డి(Jagan Mohan Reddy)తో పాటు మిగిలిన నిందితులందరూ వ్యక్తిగతంగా నాంపల్లి కోర్టుకు హాజరయ్యేలా స్పష్టమైన ఉత్తర్వులు జారీ చేయాలని కూడా కోరింది. ప్రజాప్రతినిధులపై ఉన్న కేసులను త్వరితగతిన తేల్చాలన్న సుప్రీంకోర్టు మార్గదర్శకాలకు అనుగుణంగానే తమ అభ్యర్థన ఉందని ఈడీ వాదిస్తోంది.

గత కొన్నేళ్లుగా దిగువ కోర్టుల్లో రకరకాల అప్పీళ్లు, సవాళ్లతో కాలయాపన జరుగుతూ వస్తోందని భావిస్తున్న ఈడీ(ED), ఇప్పుడు హైకోర్టు ద్వారానే ఈ గొలుసుకట్టు ఆలస్యానికి చెక్ పెట్టాలని భావిస్తోంది. ఒకవేళ తెలంగాణ హైకోర్టు కనుక ఈడీ పిటిషన్‌ను పురస్కరించుకుని రోజువారీ విచారణకు ఆదేశిస్తే, జగన్ మోహన్ రెడ్డికి చట్టపరంగా తీవ్ర ఇబ్బందులు ఎదురయ్యే అవకాశం ఉందనే చర్చ న్యాయ నిపుణుల్లో నడుస్తోంది. తాజాగా నమోదు చేసిన ఈ పిటిషన్‌పై హైకోర్టు తీసుకోబోయే తదుపరి నిర్ణయంపైనే ఈ సంచలన కేసుల భవిష్యత్తు ఆధారపడి ఉంది.