ఏపీ రాజకీయాల్లో వేడి మళ్లీ తారాస్థాయికి చేరింది. పులివెందుల(Pulivendula) మున్సిపల్ ఎన్నికల వేడి చల్లారకముందే, వైఎస్సార్‌కాంగ్రెస్ పార్టీ అధినేత వైఎస్ జగన్‌మోహన్ రెడ్డికి వరుసగా ఎదురుదెబ్బలు తగులుతున్నాయి. ఎన్నికల సమయంలో జరిగిన పరిణామాలు ఇప్పుడు ఆయనకు చట్టపరమైన చిక్కులను తెచ్చిపెట్టాయి. తాజాగా పులివెందుల అర్బన్ పోలీసు స్టేషన్‌లో జగన్‌పై కేసు నమోదవడం రాజకీయ వర్గాల్లో పెను సంచలనంగా మారింది.

నవంబర్ 1న జరిగిన పులివెందుల మున్సిపల్ ఎన్నికల పోలింగ్ రోజున హైడ్రామా నడిచింది. తమ పార్టీ ఏజెంట్లను కొన్ని పోలింగ్ బూత్‌ల లోపలికి అనుమతించడం లేదంటూ వైసీపీ అధినేత వైఎస్‌ జగన్‌(YS Jagan) తీవ్ర ఆగ్రహం వ్యక్తం చేశారు. నిబంధనలకు విరుద్ధంగా వ్యవహరిస్తున్నారంటూ రిటర్నింగ్ అధికారి కార్యాలయం ఎదుట రోడ్డుపై బైఠాయించి ఆయన ధర్నాకు దిగారు. పోలింగ్‌ను తక్షణమే రద్దు చేసి, అక్కడ రీపోలింగ్ నిర్వహించాలని డిమాండ్ చేస్తూ ఆందోళన చేపట్టారు. అయితే, ఎలాంటి ముందస్తు అనుమతి లేకుండా రోడ్డుపై ఆందోళన చేయడం, ఎన్నికల కోడ్‌ను ఉల్లంఘించడంపై తెలుగుదేశం పార్టీ నేతలు పోలీసులకు ఫిర్యాదు చేశారు. ఈ ఫిర్యాదు ఆధారంగానే పోలీసులు కేసు నమోదు చేయడం గమనార్హం.

కోర్టులోనూ చుక్కెదురు..
మరోవైపు, పులివెందుల ఎన్నికల్లో అవకతవకలు జరిగాయని, అక్కడ రీపోలింగ్ నిర్వహించాలంటూ వైసీపీ(YCP) హైకోర్టును ఆశ్రయించింది. ఈ పిటిషన్‌పై విచారణ జరిపిన న్యాయస్థానం.. దానిని కొట్టివేస్తూ మంగళవారం తీర్పు వెలువరించింది. అంతేకాకుండా, ఓట్ల లెక్కింపునకు గ్రీన్ సిగ్నల్ ఇచ్చింది. హైకోర్టులో పిటిషన్ వీగిపోయిన రోజే, ధర్నా ఘటనకు సంబంధించి జగన్‌పై పోలీసు కేసు కూడా నమోదు కావడం ఒకే రోజు రెండు భారీ షాక్‌లు తగిలినట్లయింది. ఎన్నికల నిబంధనల ఉల్లంఘన ఆరోపణలతో ప్రధాన ప్రతిపక్ష నేతపై కేసు నమోదు కావడంతో ఈ పరిణామం రాష్ట్ర రాజకీయాల్లో తీవ్ర చర్చనీయాంశమైంది. ఓట్ల లెక్కింపు సమయం ముంచుకొస్తున్న వేళ, ఈ చట్టపరమైన చిక్కులు వైసీపీ శ్రేణుల్లో ఆందోళన కలిగిస్తున్నాయి. రానున్న రోజుల్లో ఈ వ్యవహారం ఏ మలుపు తిరుగుతుందనేది ఉత్కంఠగా మారింది.