ఆంధ్రప్రదేశ్(Andhra Pradesh) రాజకీయాల్లో నిత్యం దూకుడుగా వ్యవహరించే ఏపీసీసీ అధ్యక్షురాలు వైఎస్ షర్మిల అకస్మాత్తుగా ఆసుపత్రి పాలవ్వడం రాజకీయ వర్గాల్లోనూ, సోషల్ మీడియాలోనూ తీవ్ర చర్చనీయాంశమైంది. ఆమె హాస్పిటల్ బెడ్‌పై ఉన్న ఫొటోలు ఒక్కసారిగా వైరల్ కావడంతో కాంగ్రెస్ శ్రేణులు, అభిమానులు తీవ్ర ఆందోళనకు గురయ్యారు. అసలు ఆమెకు ఏమైందంటూ సోషల్ మీడియా వేదికగా ఆరా తీయడం ప్రారంభించారు.

ఈ ఊహాగానాలకు స్వయంగా వైఎస్ షర్మిల(YS Sharmila)నే తెరదించారు. తన ఆరోగ్య పరిస్థితిపై వస్తున్న వార్తలపై స్పందిస్తూ ఆమె 'ఎక్స్' (ట్విట్టర్) వేదికగా క్లారిటీ ఇచ్చారు. తనకు పొత్తికడుపునకు సంబంధించిన ఒక మైన‌ర్ స‌ర్జ‌రీ జరిగిందని, ప్రస్తుతం తాను ఆరోగ్యంగా ఉన్నానని వెల్లడించారు. సర్జరీ విజయవంతమైందని, ప్రస్తుతం తాను వేగంగా కోలుకుంటున్నానని ఆమె తెలిపారు. ఈ క్లిష్ట సమయంలో తన కోసం ప్రార్థించిన ప్రతి ఒక్కరికీ, తనకు అండగా నిలిచిన శ్రేయోభిలాషులకు ఆమె హృదయపూర్వక ధన్యవాదాలు తెలియజేశారు. అభిమానులు ఎలాంటి ఆందోళన చెందవద్దని భరోసా ఇస్తూ, త్వరలోనే పూర్తి ఆరోగ్యంతో మళ్లీ ప్రజల ముందుకు వస్తానని స్పష్టం చేశారు.

ఏపీ కాంగ్రెస్ బాధ్యతలు చేపట్టినప్పటి నుంచి షర్మిల రాష్ట్రంలో దూకుడు పెంచారు. అధికార, ప్రతిపక్ష పార్టీలపై విమర్శలు గుప్పిస్తూ ఎప్పుడూ యాక్టివ్‌గా ఉంటున్నారు. అయితే, గత కొంతకాలంగా ఆమె ప్రత్యక్ష రాజకీయ కార్యక్రమాలకు, నిరసనలకు దూరంగా ఉండటంపై పలు అనుమానాలు వ్యక్తమయ్యాయి. దేశవ్యాప్తంగా సంచలనం సృష్టించిన నీట్(NEET) పేపర్ లీక్ వ్యవహారంపై నిరసనలు వెల్లువెత్తిన సమయంలోనూ ఆమె కనిపించకపోవడం చర్చకు దారితీసింది. ఆ సమయంలో ఆమె సోషల్ మీడియా ద్వారానే గళం వినిపించారు. ఇప్పుడు ఆమెకు సర్జరీ జరగడమే ఈ రాజకీయ విరామానికి అసలు కారణమని తేలడంతో ఆ సందిగ్ధతకు తెరపడింది. కాగా, ప్రస్తుతం డాక్టర్ల పర్యవేక్షణలో విశ్రాంతి తీసుకుంటున్న షర్మిల, త్వరలోనే కోలుకుని మళ్లీ ప్రజాక్షేత్రంలోకి దూసుకురానున్నారు. ఆమె త్వరగా కోలుకోవాలని కాంగ్రెస్ కార్యకర్తలు, నాయకులు ప్రత్యేక ప్రార్థనలు చేస్తున్నారు.