ఆంధ్రా పాలిటిక్స్‌లోనూ, టాలీవుడ్ ఇండస్ట్రీలోనూ పవన్ కల్యాణ్ అనే పేరు ఒక పవర్‌ఫుల్ బ్రాండ్. రెండు తెలుగు రాష్ట్రాల్లో ఈ పేరుకు ఉన్న క్రేజ్ అంతా ఇంతా కాదు. అయితే, ఇప్పుడు ఏపీ(AP) ఉప ముఖ్యమంత్రిగా ఉన్న పవన్ కల్యాణ్ పేరు వెనుక ఒక అద్భుతమైన ఫ్లాష్‌బ్యాక్ ఉంది. మనకు తెలిసిన ‘పవన్’ అనే పేరు ఆయనకు పుట్టుకతో వచ్చింది కాదు. ఒక సాధారణ కుర్రాడి పేరు, కోట్ల మంది నోళ్లలో నానిపోయే ‘పవర్’ఫుల్ పేరుగా ఎలా మారిందో తెలిస్తే ఎవరైనా ఆశ్చర్యపోవాల్సిందే.

నిజానికి ఆయన అసలు పేరు ‘శ్రీ కల్యాణ్ కుమార్’. తిరుమల(Tirumala)లోని ప్రముఖ యోగ నరసింహస్వామి ఆలయంలో స్వామివారి సాక్షిగా భక్తిశ్రద్ధలతో పెద్దలు పెట్టిన పేరు ఇది. కానీ, స్కూల్ రికార్డుల్లోకి ఎక్కేసరికి ఒక చిన్న మార్పు జరిగింది. పొరపాటున ‘శ్రీ’ అనే పదాన్ని రికార్డుల్లో నమోదు చేయకపోవడంతో.. అది కాస్తా కేవలం ‘కల్యాణ్ కుమార్’గా మిగిలిపోయింది. ఆ తర్వాత ఇంటి పేరు కలిసి కొణిదెల కల్యాణ్ కుమార్ గా చదువు కొనసాగింది.

అయితే, ఈ ‘కల్యాణ్ కుమార్(Kalyan Kumar)’ కాస్తా ‘పవన్ కల్యాణ్’గా మారడం వెనుక ఒక పెద్ద సాహసమే ఉంది. సినిమాల్లోకి రాకముందు ఆయన మార్షల్ ఆర్ట్స్‌లో కఠినమైన శిక్షణ తీసుకునేవారు. కేవలం విద్యను నేర్చుకోవడమే కాదు, తన శారీరక దారుఢ్యాన్ని నిరూపించుకోవడానికి అత్యంత ప్రమాదకరమైన విన్యాసాలు చేసేవారు. ఛాతీపై వందల కిలోల బరువున్న బండరాళ్లను ఉంచుకుని, వాటిని వేరేవాళ్లతో పగలగొట్టించేవారు. ఆయన ఒంట్లోని ఆ పట్టుదల, మెరుపు వేగం చూసి మార్షల్ ఆర్ట్స్ గురువు ముగ్ధులయ్యారు.

ఆ గురువే కల్యాణ్ కుమార్ శౌర్యాన్ని చూసి, “నువ్వు పవనపుత్ర హనుమంతుడిలా ఉన్నావు” అంటూ మెచ్చుకున్నారు. ఆ హనుమంతుడి స్ఫూర్తితోనే ‘కల్యాణ్’ అనే పేరుకు ముందు ‘పవన్’ అనే పదాన్ని చేర్చారు. అలా సినిమాల్లోకి అడుగుపెట్టడానికి ముందే ఆయన పేరు ‘పవన్ కల్యాణ్(Pawan Kalyan)’గా స్థిరపడిపోయింది. ఒక గురువు ఇచ్చిన ఆశీర్వాదం, హనుమంతుడి కనెక్షన్‌తో మారిన ఆ పేరే.. ఈరోజు ఆయనకు ఒక ప్రత్యేక గుర్తింపును, తిరుగులేని ప్రజాదరణను తెచ్చిపెట్టింది.