తమిళనాడు రాజకీయ చరిత్రలో ఒక కొత్త శకం మొదలైంది. ద్రవిడ పార్టీల కోటను బద్దలు కొడుతూ ‘దళపతి’ విజయ్ తన తమిళగ వెట్రి కళగం (TVK) ద్వారా సృష్టించిన ప్రభంజనం ఇప్పుడు దేశవ్యాప్తంగా హాట్ టాపిక్. ఒకప్పుడు ఎంజీఆర్, ఎన్టీఆర్ సాధించిన అసాధారణ విజయాలను విజయ్ గుర్తుకు తెచ్చారు. అసలు ఓడిపోవాల్సిన చోట గెలుపు జెండాను ఎలా ఎగురవేశారు? ఆయన్ని విజయతీరాలకు చేర్చిన రాజకీయ కోణాలేంటో చూస్తే..

తమిళ రాజకీయాల్లో కరుణానిధి, జయలలిత వంటి హేమాహేమీల నిష్క్రమణ తర్వాత ఒక పెద్ద నాయకత్వ శూన్యత ఏర్పడింది. స్టాలిన్ ప్రభుత్వంపై ఉన్న వ్యతిరేకతను అందిపుచ్చుకోవడంలో AIADMK వైఫల్యం విజయ్‌కి వరంగా మారింది. అటు డీఎంకే కాదు.. ఇటు ఏఐఏడీఎంకే కాదు.. మాకు కొత్త రక్తం కావాలి అని కోరుకున్న సామాన్య ఓటరుకు విజయ్ ఒక పవర్‌ఫుల్ ఆల్టర్నేటివ్‌గా కనిపించారు. పాత తరం రాజకీయాల నుంచి విముక్తి కోరుకున్న తటస్థ ఓటర్లు గంపగుత్తగా విజయ్ వైపు మొగ్గు చూపారు.

విజయ్ తన పార్టీ సిద్ధాంతాన్ని చాలా తెలివిగా రూపొందించారు. ఆయన ద్రవిడ మూలాలను విస్మరించలేదు, అలాగని సంకుచిత ప్రాంతీయతత్వానికి పరిమితం కాలేదు. మతం వేరు - రాజకీయం వేరు అనే స్పష్టమైన లైన్ తీసుకుంటూనే, తమిళ సంస్కృతిని గౌరవించే జాతీయ దృక్పథాన్ని జోడించారు. ఇది అటు మైనారిటీలను, ఇటు హిందూ ఓటర్లను సమానంగా ఆకట్టుకుంది. ద్రవిడ సిద్ధాంతంలోని సామాజిక న్యాయాన్ని ఆధునిక అవసరాలకు అనుగుణంగా మార్చి చెప్పడం ఆయనకు పెద్ద ప్లస్ అయ్యింది.

రజనీకాంత్ రాజకీయాల్లోకి రాకముందే వెనక్కి తగ్గడానికి, కమల్ హాసన్ క్షేత్రస్థాయిలో విఫలం కావడానికి కారణం.. బలమైన కార్యకర్తల వ్యవస్థ లేకపోవడం. కానీ విజయ్ అలా చేయలేదు. గత పదేళ్లుగా తన 'విజయ్ మక్కల్ ఇయక్కం' (VMI) ద్వారా గ్రామీణ స్థాయిలో సేవా కార్యక్రమాలు చేస్తూ ఓటర్ల నాడి పట్టుకున్నారు. ఎన్నికల ప్రకటనకు ముందే ప్రతి నియోజకవర్గంలో బూత్ కమిటీలను ఏర్పాటు చేసి, ఒక వ్యవస్థాగతమైన పార్టీగా TVKని తీర్చిదిద్దడం ఆయన విజయానికి పునాది వేసింది.

తమిళనాడులో దాదాపు 30-40% ఉన్న యువ ఓటర్లే ఈ ఎన్నికల్లో డిసైడింగ్ ఫ్యాక్టర్. సినిమా తెరపై విజయ్(Vijay) పోషించిన సామాజిక బాధ్యత కలిగిన పాత్రలు, ఆయన ఇచ్చే స్ఫూర్తిదాయకమైన ప్రసంగాలు యువతను కట్టిపడేశాయి. నిరుద్యోగం, అవినీతిపై ఆయన ఎక్కుపెట్టిన విమర్శలు యువతలో ఆశలు రేకెత్తించాయి. సోషల్ మీడియాలో ఆయనకున్న ఫాలోయింగ్ డిజిటల్ ప్రచారంలో ప్రత్యర్థి పార్టీలను వెనక్కి నెట్టేసింది.

రాజకీయ కోణంలో చూస్తే.. విజయ్(Vijay) తనను తాను ఒక సామాన్య ప్రజల మనిషిగా ప్రెజెంట్ చేసుకున్నారు. ఎంజీఆర్ ఏ విధంగానైతే మహిళా ఓటర్ల మనసు గెలుచుకున్నారో, విజయ్ కూడా సంక్షేమ పథకాలు, విద్యార్థులకు ప్రోత్సాహకాల ద్వారా ఆ వర్గాన్ని ఆకర్షించారు. రాజకీయాల్లోకి వచ్చే ముందు ఆయన చేసిన హోమ్ వర్క్, అనావశ్యక వివాదాలకు దూరంగా ఉంటూ నేరుగా ప్రజల సమస్యలపై స్పందించడం ఆయన పట్ల నమ్మకాన్ని పెంచింది.

మొత్తంగా చూసుకుంటే.. విజయ్ విజయం తమిళనాడు(Tamilnadu) రాజకీయాల్లో ఒక కొత్త ప్రయోగానికి నాంది. ద్రవిడ సిద్ధాంతం పేరుతో సాగుతున్న పాత రాజకీయాల కాలం చెల్లిందని, ప్రజలు అభివృద్ధిని, పారదర్శకతను కోరుకుంటున్నారని ఈ తీర్పు నిరూపించింది. ఎన్టీఆర్ మాదిరిగానే విజయ్ కూడా ప్రజల గొంతుకగా మారడంలో కృతకృత్యులయ్యారు. ఇది కేవలం ఒక పార్టీ విజయం కాదు, ఒక కొత్త రాజకీయ ఆలోచనా ధోరణికి ప్రజలు ఇచ్చిన పట్టాభిషేకం.