రాష్ట్రంలో వైసీపీ చేపట్టిన మెగా డీఎస్సీ(Mega DSC) నిరసన ర్యాలీలు, దీక్షలు తీవ్ర నిరాశను మిగులుస్తున్నాయి. డీఎస్సీలో అక్రమాలు, మంత్రి నారా లోకేష్ రాజీనామా డిమాండ్‌తో చేపట్టిన ఈ ఆందోళనలకు క్షేత్రస్థాయిలో కనీస ప్రజా మద్దతు లభించడం లేదు. కేవలం పార్టీ జెండాలు పట్టుకున్న కొద్దిమంది నాయకులు, కార్యకర్తలు తప్ప సామాన్య ప్రజలు లేదా బాధితులు ఎవరూ రోడ్డెక్కి గళం విప్పడం లేదు.

జాతీయ స్థాయిలో నీట్ (NEET) ఉద్యమం సాధించిన విజయాన్ని ఆదర్శంగా తీసుకుని, ఏపీలోనూ జెన్-జీ యువతను కూడగట్టి ప్రభుత్వాన్ని ఇరుకున పెట్టాలని వైసీపీ పెద్దలు భావించారు. కానీ, నీట్ ఉద్యమం వెనుక ఉన్న బాధితుల ఆవేదన, చిత్తశుద్ధి ఇక్కడ కొరవడ్డాయి. "మేము డీఎస్సీ బాధితులం" అంటూ ముందుకు వచ్చే వారే కరువవడంతో, వైసీపీ అంచనాలు పూర్తిగా తలకిందులయ్యాయి.

మరోవైపు, ఈ నిరసనలను అధికార కూటమి ప్రభుత్వం పెద్దగా సీరియస్‌గా తీసుకోవడం కూడా లేదు. అసలు ప్రజలే పట్టించుకోని ఈ కార్యక్రమాలపై ప్రభుత్వం ఎలాంటి స్పందన తెలియజేయడం లేదు. దీనికి విరుద్ధంగా, డీఎస్సీ ద్వారా ఉద్యోగాలు సాధించిన అభ్యర్థులే స్వయంగా రంగంలోకి దిగి కర్నూలు కొండా రెడ్డి బురుజు సెంటర్‌లో ప్రభుత్వానికి అనుకూలంగా నినాదాలు చేస్తూ వైసీపీ(YCP)కి గట్టి కౌంటర్ ఇస్తున్నారు.

ప్రజాదరణ లేకపోవడం, జెన్-జీ (Gen-Z)ల నుంచి మద్దతు కరవవడంతో వైసీపీ డీఎస్సీ పోరు ఒక ఫ్లాప్ షోలా ముగుస్తోందనే చర్చ రాజకీయ వర్గాల్లో జోరుగా సాగుతోంది. సీజేపీ తరహా ఉద్యమాలను కేవలం రాజకీయ ప్రయోజనాల కోసం కాపీ కొట్టాలని చూస్తే ఫలితం ఉండదని, ప్రజల మద్దతు లేని ఇటువంటి నిరసనలు చివరికి కేవలం పార్టీ కార్యక్రమాలుగానే మిగిలిపోతాయని స్పష్టమవుతోంది.