వరుస పరాజయాలు ఒక దర్శకుడి కెరీర్‌ను ప్రశ్నార్థకం చేస్తాయి. కానీ, ఆ దర్శకుడి పేరు పూరి జగన్నాథ్ అయితే లెక్కలు వేరుగా ఉంటాయి. `లైగర్`, `డబుల్ ఇస్మార్ట్` వంటి డిజాస్టర్లు ఎదురైనప్పటికీ, పూరి బ్రాండ్ వాల్యూ ఏమాత్రం తగ్గలేదని తాజా ఫిలిం నగర్ టాక్ నిరూపిస్తోంది. విజయ్ సేతుపతితో `స్లమ్ డాగ్` పూర్తి చేసి విడుదలకు సిద్ధం చేస్తున్న పూరి, తన తదుపరి సినిమా కోసం ఏకంగా మ‌రో కోలీవుడ్ స్టార్ హీరో సూర్యను ఒప్పించినట్లు సమాచారం. ఈ కాంబినేషన్‌పై అధికారిక ప్ర‌క‌ట‌న లేన‌ప్ప‌టికీ, ఇండస్ట్రీ వర్గాల్లో మాత్రం ఈ వార్త బలంగా వినిపిస్తోంది. 

సాధారణంగా టయర్-1 హీరోలు ఒక దర్శకుడికి అవకాశం ఇచ్చే ముందు ఆయన గత సినిమాల ట్రాక్ రికార్డ్‌ను క్షుణ్ణంగా పరిశీలిస్తారు. అయితే పూరి విషయంలో మాత్రం హీరోల నమ్మకం వేరే లెవల్లో ఉంటుంది. ఆయన రాసే పవర్ ఫుల్ క్యారెక్టరైజేషన్లు, షూటింగ్‌ను వేగంగా పూర్తి చేసే తీరు స్టార్ హీరోలను ఆకర్షిస్తుంటాయి. సూర్య వంటి వెర్సటైల్ యాక్టర్ పూరి జగన్నాథ్ మేకింగ్ స్టైల్‌కు గ్రీన్ సిగ్నల్ ఇచ్చారంటే, ఖచ్చితంగా అందులో బిజినెస్ మేన్ తరహా వింటేజ్ మార్క్ కంటెంట్ ఏదో ఉండే ఉంటుందని అభిమానులు అంచనా వేస్తున్నారు.

ప్రస్తుతం పూరి దృష్టి అంతా `స్లమ్ డాగ్` విడుదలపైనే ఉంది. విజయ్ సేతుపతి హీరోగా, కన్నడ స్టార్ దునియా విజయ్ విలన్‌గా, టబు కీలక పాత్రలో నటించిన ఈ క్రైమ్ యాక్షన్ డ్రామా ప్రస్తుతం పోస్ట్ ప్రొడక్షన్ పనుల్లో ఉంది. సంయుక్త మీనన్ హీరోయిన్‌గా నటిస్తున్న ఈ చిత్రాన్ని ఈ వేసవిలోనే తెలుగు, తమిళ భాషల్లో గ్రాండ్‌గా రిలీజ్ చేసేందుకు ప్లాన్ చేస్తున్నారు. ఈ సినిమా హిట్ టాక్ తెచ్చుకుంటే, సూర్యతో పూరి చేయబోయే ప్రాజెక్టుపై అంచనాలు ఆకాశాన్ని తాకడం ఖాయం.