ఆంధ్రప్రదేశ్(Andhra Pradesh) రాజకీయ చిత్రపటంలో ఇప్పుడు ఆసక్తికరమైన సమీకరణాలు కనిపిస్తున్నాయి. సాధారణంగా ఒక ఇంట్లో ఒకరికి రాజకీయ పదవి దక్కడం సహజం.. కానీ రాష్ట్రంలోని నాలుగు జిల్లాల్లో మాత్రం ఒకే కుటుంబానికి చెందిన ఇద్దరు వ్యక్తులు కీలక ప్రజాప్రతినిధులుగా కొలువుదీరారు. ఒకరు అసెంబ్లీలో అడుగుపెడితే, మరొకరు జిల్లా పరిషత్ పీఠాన్ని అధిరోహించి స్థానిక రాజకీయాల్లో సరికొత్త రికార్డు సృష్టించారు.
ముందుగా ఏలూరు జిల్లా విషయానికొస్తే.. దెందులూరు నియోజకవర్గ శాసనసభ్యుడిగా చింతమనేని ప్రభాకర్(Chintamaneni Prabhakar) కొనసాగుతుండగా, ఆయన కుమార్తె సాయి నవ్యశ్రీ ఏలూరు జిల్లా పరిషత్ ఛైర్పర్సన్గా బాధ్యతలు చేపట్టారు. తండ్రి శాసనసభలో, కుమార్తె జిల్లా పరిషత్లో కీలక భూమిక పోషిస్తుండటం అక్కడి రాజకీయ వర్గాల్లో చర్చనీయాంశమైంది.
కడప జిల్లా రాజకీయాల్లోనూ ఒకే కుటుంబానికి రెండు కీలక బాధ్యతలు దక్కాయి. కమలాపురం ఎమ్మెల్యేగా పుత్తా కృష్ణచైతన్య రెడ్డి(Putta Krishna Chaitanya Reddy) ఉండగా, ఆయన తండ్రి, గతంలో ఎమ్మెల్సీగా పనిచేసిన పుత్తా నరసింహారెడ్డి వైఎస్సార్ కడప జడ్పీ పీఠాన్ని అధిష్టించారు. తండ్రీకొడుకుల ద్వయం జిల్లాలో రెండు ముఖ్యమైన పదవుల్లో కొనసాగుతోంది.
అటు రాయలసీమలోని శ్రీ సత్యసాయి జిల్లాలోనూ ఇదే తరహా దృశ్యం ఆవిష్కృతమైంది. రాప్తాడు ఎమ్మెల్యేగా పరిటాల సునీత ప్రాతినిధ్యం వహిస్తుండగా, ఆమె తనయుడు పరిటాల శ్రీరామ్(Paritala Sriram) శ్రీ సత్యసాయి జడ్పీ ఛైర్పర్సన్గా ఎన్నికయ్యారు. తల్లీకొడుకులు ఇద్దరూ జిల్లా అభివృద్ధిలో కీలక పదవులు పొందడం విశేషం.
ఇక కొత్తగా ఆవిర్భవించిన మార్కాపురం జిల్లాలోనూ అన్నదమ్ముల హవా కనిపిస్తోంది. మార్కాపురం ఎమ్మెల్యేగా కందుల నారాయణరెడ్డి(Kandula Narayana Reddy) కొనసాగుతుండగా, ఆయన సోదరుడు కందుల రామిరెడ్డి మార్కాపురం తొలి జడ్పీ ఛైర్పర్సన్గా ఏకగ్రీవంగా ఎన్నికై చరిత్రలో నిలిచారు. మొత్తానికి ఏపీలోని ఈ నాలుగు జిల్లాల్లోనూ ఎమ్మెల్యే, జడ్పీ ఛైర్పర్సన్ పదవులు ఒకే ఇంటి గడపలో ఉండటం విశేషం. కొన్ని చోట్ల మాజీ ఎమ్మెల్యేలకు కూడా జడ్పీ పీఠాలు దక్కడంతో, ఈసారి జిల్లా పరిషత్ రాజకీయాలు మరింత ఆసక్తికరంగా మారాయి.