ఆంధ్రప్రదేశ్(Andhra Pradesh)లో రాజకీయ వాతావరణం ఒక్కసారిగా వేడెక్కింది. స్థానిక సమరానికి సంబంధించి రాష్ట్ర ఎన్నికల సంఘం (ఎస్ఈసీ) కసరత్తును మరింత వేగవంతం చేసింది. ఇందులో భాగంగా తాజాగా గ్రామ పంచాయతీ ఎన్నికల రెండో విడత షెడ్యూల్ను అధికారులు అధికారికంగా విడుదల చేశారు. ఊరూవాడా ఎన్నికల సందడి నెలకొనేలా పక్కా ప్రణాళికతో అడుగులు పడుతున్నాయి.
తాజా షెడ్యూల్ ప్రకారం.. రాష్ట్రవ్యాప్తంగా నవంబర్ 29న రెండో విడత పోలింగ్ జరగనుంది. ఈ ఎన్నికల ప్రక్రియను అత్యంత పకడ్బందీగా నిర్వహించేందుకు ఎస్ఈసీ(SEC) అన్ని ఏర్పాట్లు పూర్తి చేసింది. ఈ నెల 18 నుంచి 20 వరకు నామినేషన్ల స్వీకరణ ప్రక్రియ ప్రారంభం కానుండటంతో, ఆశావహులు, ప్రధాన రాజకీయ పార్టీల నాయకులు ఇప్పటి నుంచే లెక్కలు వేసుకోవడం మొదలుపెట్టారు.
ఈ విడతలో మొత్తం 4,960 సర్పంచ్ స్థానాలతో పాటు, ఏకంగా 49,224 వార్డు సభ్యుల పదవులకు ఎన్నికలు జరగనున్నాయి. నామినేషన్ల పర్వం ముగిసిన తర్వాత.. నవంబర్ 21న పరిశీలన, 24న ఉపసంహరణ గడువు ముగియనుంది. అదే రోజు అభ్యర్థుల తుది జాబితాను ప్రకటించి, నవంబర్ 29న ఉదయం 7 గంటల నుంచి మధ్యాహ్నం 1 గంట వరకు పోలింగ్ నిర్వహిస్తారు. పోలింగ్(polling) ముగిసిన వెంటనే లెక్కింపు చేపట్టి ఫలితాలు వెల్లడించనున్నారు. ఏవైనా కారణాలతో పోలింగ్ నిలిచిపోతే, అవసరమైన చోట నవంబర్ 30న రీ-పోలింగ్ జరుపుతారు. మొత్తం మూడు విడతలుగా సాగనున్న ఈ పంచాయతీ మహా సంగ్రామంలో మీ గ్రామంలో పోలింగ్ ఎప్పుడనేది ఇప్పుడు సర్వత్రా ఆసక్తికరంగా మారింది.