సినిమా తెరపైనే కాదు, ఇప్పుడు రియల్ లైఫ్‌లోనూ సరికొత్త ప్రయాణానికి శ్రీకారం చుట్టారు టాలీవుడ్ హీరో మంచు మనోజ్, ఆయన సతీమణి భూమా మౌనిక రెడ్డి. వ్యాపార రంగంలో దూసుకుపోయేందుకు ఈ ట్రెండీ కపుల్ వేసిన అడుగులు ఇప్పుడు ఇండస్ట్రీలో హాట్ టాపిక్‌గా మారాయి. విశాఖపట్నం వేదికగా అత్యంత వైభవంగా జరుగుతున్న 31వ సీఐఐ భాగస్వామ్య సదస్సు (CII Partnership Summit 2026) ఇందుకు వేదికైంది. ఈ వేదికపై ఆంధ్రప్రదేశ్ ప్రభుత్వంతో 'నమస్తే వరల్డ్' స్టార్టప్ తరఫున భూమా మౌనిక రెడ్డి అత్యంత కీలకమైన ఒప్పందంపై (MoU) సంతకం చేశారు. రాష్ట్రంలో అచ్చమైన భారతీయ సంస్కృతిని ప్రతిబింబించేలా ఆటబొమ్మలు, హస్తకళల తయారీ యూనిట్‌ను ఏర్పాటు చేసేందుకు ఏపీ సర్కార్‌తో చేతులు కలిపారు.

ఈ ప్రాజెక్ట్ కోసం మంచు మనోజ్‌(Manchu Manoj) దంపతులు ఏకంగా రూ. 36 కోట్ల భారీ పెట్టుబడిని పెడుతుండటం విశేషం. కర్నూలు జిల్లాలోని ఓర్వకల్లు పారిశ్రామిక వాడలో ఈ పరిశ్రమ రూపుదిద్దుకోనుంది. దీని ద్వారా కేవలం బిజినెస్ గ్రోత్ మాత్రమే కాకుండా, మన దేశంలోని స్థానిక హస్తకళాకారులకు సరికొత్త ఉపాధి అవకాశాలు, గ్లోబల్ మార్కెట్‌లో గుర్తింపు దక్కేలా చేయడమే లక్ష్యంగా ఈ స్టార్టప్ పనిచేయనుంది.

ఈ సందర్భంగా భూమా మౌనిక రెడ్డి(Bhuma Mounika Reddy) మాట్లాడుతూ.. ఏపీ ప్రభుత్వం కల్పిస్తున్న ఈ అద్భుతమైన వేదిక ఎంతో మంది యువ పారిశ్రామికవేత్తలకు, లోకల్ ఆర్టిస్టులకు ఒక గొప్ప అవకాశమని కొనియాడారు. అంతర్జాతీయ స్థాయి వేదికపై స్థానిక కళలకు వైభవం తెచ్చే ఈ ప్రయాణం పట్ల ఆమె హర్షం వ్యక్తం చేస్తూ, ఏపీ ప్రభుత్వానికి ప్రత్యేక కృతజ్ఞతలు తెలిపారు. సినిమాలతో పాటు ఇప్పుడు పారిశ్రామిక రంగంలోనూ మంచు ఫ్యామిలీ ఈ రేంజ్‌లో ఎంట్రీ ఇస్తుండటంతో సర్వత్రా ఆసక్తి నెలకొంది.