వైసీపీలో ఒకప్పుడు నంబర్ టూగా చక్రం తిప్పిన విజయసాయిరెడ్డి ఇప్పుడు పూర్తిగా రూట్ మార్చేశారు. సొంత పార్టీపైనే తీవ్ర విమర్శలు గుప్పిస్తూ, కొత్తగా 'పరివర్తన రాజనీతి పార్టీ' (PVP)తో రాజకీయ రంగ ప్రవేశం చేసిన ఆయన.. సరికొత్త వ్యూహాలకు తెరలేపారు. తాజాగా ఆయన చేసిన వ్యాఖ్యలు ఆంధ్రప్రదేశ్ రాజకీయాల్లో హాట్ టాపిక్‌గా మారాయి.

తన కొత్త పార్టీలోకి రావాల్సిందిగా వైసీపీ శ్రేణులకు విజయసాయిరెడ్డి(Vijayasai Reddy) బహిరంగంగానే పిలుపునిచ్చారు. ప్రజా సేవ చేయాలనే తపన ఉన్న ప్రతి ఒక్కరికీ తన పార్టీ తలుపులు ఎప్పుడూ తెరిచే ఉంటాయని స్పష్టం చేశారు. పార్టీలో ద్వితీయ, తృతీయ శ్రేణి నేతలే టార్గెట్‌గా ఆయన ఈ ఆఫర్ ఇచ్చినట్లు స్పష్టమవుతోంది. సహజంగానే తనతో పాటు ఒకప్పుడు పనిచేసిన నేతలను ఆకట్టుకోవడం ద్వారా వైసీపీ పునాదులను కదిలించాలనేది ఆయన మాస్టర్ ప్లాన్‌గా కనిపిస్తోంది.

జగన్‌పై విజయసాయి ఘాటు విమర్శలు
ఈ సందర్భంగా పార్టీ అధినేత వైఎస్ జగన్‌మోహన్ రెడ్డిపై విజయసాయిరెడ్డి తీవ్ర స్థాయిలో విరుచుకుపడ్డారు. వైసీపీని ఇటుక ఇటుక పేర్చి తాను కూడా ఎంతగానో కష్టపడ్డానని గుర్తుచేసుకున్న ఆయన, చివరికి తనకు దక్కింది నిరాశేనని ఆవేదన వ్యక్తం చేశారు. కేవలం సంక్షేమ పథకాలే కాకుండా, జగన్‌(Jagan) అహంకార వైఖరి కూడా ఓటమికి కారణమని విశ్లేషించారు. ప్రజలకు, నాయకులకు మధ్య అడ్డంగా పరదాలు కట్టుకుని తిరిగితే ప్రజలు ఎలా గెలిపిస్తారని సూటిగా ప్రశ్నించారు. అసలు జగన్‌లో నాయకత్వ లక్షణాలే లేవంటూ ఆయన చేసిన కామెంట్స్ ఇప్పుడు రాజకీయ వర్గాల్లో తీవ్ర చర్చనీయాంశమయ్యాయి.

2019లో 151 సీట్లు గెలుచుకున్న పార్టీ, 2024 నాటికి కేవలం 11 స్థానాలకు ఎందుకు పడిపోయిందో ఆత్మపరిశీలన చేసుకోవాలని సాయిరెడ్డి సవాల్ విసిరారు. ప్రస్తుతం విజయసాయిరెడ్డి చూపు పూర్తిగా వైసీపీ వైపే ఉందనేది ఆయన మాటల ద్వారా స్పష్టమవుతోంది. మరి ఆయన ఇస్తున్న ఈ ఓపెన్ ఆఫర్కు వైసీపీ(YCP) నుంచి ఎవరైనా స్పందిస్తారా? లేదా? అన్నది రానున్న రోజుల్లో తేలనుంది.