ఆంధ్రప్రదేశ్ శాస్త్రీయ నృత్య సంప్రదాయాన్ని ప్రపంచ వేదికపై ‘‘సాహితి కూచిపూడి కళా క్షేత్రం’’ ప్రదర్శించింది. ఫ్లోరిడాలోని ఒర్లాండోలో ఉన్న వాల్ట్ డిస్నీ వరల్డ్‌లో జరిగిన దీపావళి నృత్యోత్సవం 2026లో ఒక గొప్ప మైలురాయిని సాధించింది. కాలిఫోర్నియా నుంచి బృందం రెండు అద్భుతమైన ప్రదర్శనలతో చరిత్ర సృష్టించింది. అంతర్జాతీయ నృత్య ప్రదర్శన వేదికపై కూచిపూడి ప్రదర్శనలిచ్చి ఈ బృందం రికార్డ్ క్రియేట్ చేసింది.

యునైటెడ్ కింగ్‌డమ్, ఆస్ట్రేలియా, కరేబియన్ దీవుల నుంచి వచ్చిన కళాకారులతో కలిసి ఈ ప్రదర్శన ఇచ్చారు. అంతేకాదు మ్యాజిక్ కింగ్‌డమ్‌లోని ప్రసిద్ధ సిండరెల్లా కాజిల్ ముందు, మెయిన్ స్ట్రీట్ యు.ఎస్.ఎ.పై 15 నిమిషాల నిరంతర ప్రదర్శనతో ప్రేక్షకులను ఈ నృత్యకారుల బృందం మంత్రముగ్ధులను చేసింది. సాంప్రదాయ తరంగం. ఇత్తడి పళ్లెం అంచుపై నిలబడి నృత్యం చేస్తూ యువ నర్తకులు అద్భుతమైన లయ, సమతుల్యత, ఖచ్చితత్వాన్ని ప్రదర్శించి ఆహూతులను ఆకట్టుకున్నారు. ఈ శాస్త్రీయ భారతీయ నృత్య రూపం యొక్క సౌందర్యం, లావణ్యంతో వారు ప్రేక్షకులను కట్టిపడేశారు.

శివపార్వతులు...రాధాకృష్ణులను ప్రతిబింబించే సంప్రదాయ వస్త్రాలు, ఆభరణాలతో అలంకరించుకున్న యువ నర్తకులు భారతీయ సంస్కృతి, వారసత్వం యొక్క గొప్పదనాన్ని చాటిచెప్పారు.

కళా దర్శకురాలు డా. సాహితి లతా భండారి నాయకత్వంలో జరిగిన ఈ కార్యక్రమం అద్భుతంగా సాగింది. ఏడాది పాటు ఆమె అంకితభావం, పట్టుదల, సాంస్కృతిక పట్టుదలకు ఈ ఈవెంట్ లో నర్తకుల ప్రదర్శనే నిదర్శనం. పూర్తిగా స్వీయ నిధులతో నిర్వహించిన ఈ కార్యక్రమం, అంతర్జాతీయ వేదికపై కూచిపూడి నృత్యాన్ని పరిరక్షించి ప్రచారం చేయాలన్న బృందం యొక్క నిబద్ధతను ప్రతిబింబిస్తుంది.

ఈ విజయం నర్తకులకు, వారి కుటుంబాలకు, భారతీయ సాంస్కృతిక సమాజానికి గర్వకారణం. ప్రపంచంలోని అత్యంత ప్రసిద్ధ వినోద కేంద్రాలలో ఒకటైన వాల్ట్ డిస్నీ వరల్డ్‌లో ఆంధ్రప్రదేశ్ యొక్క సుసంపన్న కళా వారసత్వాన్ని ప్రేక్షకుల ముందు ఉంచిన ఈ సందర్భం నిజంగా చరిత్రాత్మకం.