ఉత్తరాంధ్ర రాజకీయాలకు కేంద్ర బిందువైన విజయనగరం(Vizianagaram)  జిల్లాలో ఇప్పుడు ఎక్కడ చూసినా ఒకటే చర్చ. దశాబ్దాలుగా జిల్లా రాజకీయాలను తమ కనుసన్నల్లో నడిపించిన ఒకే కుటుంబం నుంచి ఇద్దరు కీలక నేతలు ఇప్పుడు రాజకీయంగా ఎదురుబొదురుగా నిలవడం రాష్ట్రవ్యాప్తంగా సంచలనం సృష్టిస్తోంది. మాజీ మంత్రి బొత్స సత్యనారాయణ, ఆయన మేనల్లుడు మజ్జి శ్రీనివాసరావు (చిన్న శీను) మధ్య నడుస్తున్న ఈ సిసలైన రాజకీయ పోరు.. ఇప్పుడు స్థానిక సంస్థల ఎన్నికలను అసాధారణ ఉత్కంఠలోకి నెట్టింది.

ఇన్నాళ్లూ బొత్స సత్యనారాయణ నీడలోనే ఎదిగి, ఆయన రాజకీయ వ్యూహాలకు ప్రధాన బలంగా నిలిచిన చిన్న శీను.. వైఎస్సార్‌సీపీని వీడి టీడీపీ(TDP) గూటికి చేరడం ఒక్కసారిగా సమీకరణాలను తలకిందులు చేసింది. ఇప్పుడు జిల్లా పరిషత్ చైర్మన్ పీఠం బీసీ మహిళకు రిజర్వ్ కావడంతో, ఈ ప్రతిష్టాత్మక పీఠం కోసం మామా-అల్లుళ్లిద్దరూ తమ కుమార్తెలను రంగంలోకి దించారు. బొత్స తన కుమార్తె డాక్టర్ అనూషను బరిలో నిలపగా, చిన్న శీను తన కుమార్తె మజ్జి సిరి సహస్రను కూటమి అభ్యర్థిగా రేసులో పెట్టారు. దీంతో ఈ ఎన్నిక కేవలం ఒక జడ్పీటీసి స్థానం కోసం జరుగుతున్న పోరులా కాకుండా, రెండు కుటుంబాల పరువుకు సంబంధించిన సవాల్‌గా మారింది.

ఉత్తరాంధ్ర రాజకీయాల్లో తిరుగులేని నేతగా ముద్రపడిన బొత్స సత్యనారాయణ(Botsa Satyanarayana)కు ప్రస్తుత పరిణామాలు భారీ సవాళ్లను విసురుతున్నాయి. రాష్ట్రంలో వైఎస్సార్‌సీపీ అధికారం కోల్పోవడం, క్షేత్రస్థాయిలో కేడర్ డీలా పడటం ఆయనకు పెద్ద మైనస్‌గా మారింది. దీంతో దశాబ్దాలుగా జిల్లాపై ఉన్న తన రాజకీయ పట్టును ఏమాత్రం సడలకుండా కాపాడుకోవడానికి ఆయన తన సర్వశక్తులూ ఒడ్డుతున్నారు. అయితే, నామినేషన్ల పర్వంలో కుటుంబ సభ్యుల నామినేషన్లు తిరస్కరణకు గురికావడం వంటి అనూహ్య పరిణామాలు ఆ వర్గానికి పెద్ద దెబ్బగా మారాయి. అయినప్పటికీ, తన రాజకీయ అనుభవాన్ని పూర్తిగా రంగరించి, కుమార్తె విజయం కోసం ఆయన ప్రతి అడుగును ఎంతో జాగ్రత్తగా వేస్తున్నారు.

మరోవైపు, చిన్న శీను(Chinna Seenu) అత్యంత వ్యూహాత్మకంగా పావులు కదుపుతున్నారు. జిల్లా వ్యాప్తంగా ఆయనకు వ్యక్తిగతంగా ఉన్న బలమైన నెట్‌వర్క్, ద్వితీయ శ్రేణి నాయకులతో ఉన్న సత్సంబంధాలు ఆయనకు పెద్ద అండగా నిలుస్తున్నాయి. దీనికి తోడు రాష్ట్రంలో అధికారంలో ఉన్న కూటమి పూర్తి మద్దతు శీను వెనుక నిలిచింది. కూటమి ఎమ్మెల్యేలు, స్థానిక నాయకులు అంతా ఒక్కటై సిరి సహస్ర గెలుపు కోసం క్షేత్రస్థాయిలో తెగ శ్రమిస్తున్నారు. ఆర్థిక, అంగ బలాలు కూటమి వైపు ఉండటంతో ఆ శిబిరంలో ఆత్మవిశ్వాసం రెట్టింపు అయింది. మొత్తానికి ఒకప్పుడు ఒకే గూటి కింద కలిసి పనిచేసిన మామా-అల్లుళ్లు.. ఇప్పుడు జడ్పీ పీఠం కోసం నువ్వా-నేనా అంటూ తలపడుతుండటం విజయనగరం రాజకీయాన్ని వేడెక్కించింది. అయితే తన రాజకీయ సామ్రాజ్యాన్ని కాపాడుకోవాలని బొత్స తీవ్రంగా ప్రయత్నిస్తుంటే, కూటమి అండతో చరిత్ర సృష్టించాలని చిన్న శీను వ్యూహాలు రచిస్తున్నారు. మరి ఈ హై-వోల్టేజ్ పోరులో విజయం ఏ కూతురిని వరిస్తుంది? విజయనగరం జడ్పీ పీఠాన్ని అధిరోహించే అదృష్టవంతురాలు ఎవరో తేలాలంటే ఫలితాల వరకు వేచి చూడాల్సిందే.