ఏపీ రాజకీయాల్లో అనూహ్య పరిణామం చోటుచేసుకుంది. స్థానిక సమరంలో పట్టు నిలబెట్టుకోవాలని భావించిన వైఎస్సార్ కాంగ్రెస్ పార్టీకి అన్నమయ్య జిల్లా పుంగనూరు వేదికగా బిగ్ షాక్ తగిలింది. అధికార పార్టీ దౌర్జన్యాలు, అధికారుల ఏకపక్ష వైఖరికి నిరసనగా పుంగనూరు మున్సిపల్ ఎన్నికల బరి నుంచి తప్పుకుంటున్నట్లు మాజీ మంత్రి, స్థానిక ఎమ్మెల్యే పెద్దిరెడ్డి రామచంద్రారెడ్డి(Peddireddy Ramachandra Reddy) ప్రకటించడం రాష్ట్రవ్యాప్తంగా హాట్ టాపిక్‌గా మారింది.

నామినేషన్ల పర్వం ప్రారంభమైన నాటి నుంచే పుంగనూరు రాజకీయం వేడెక్కింది. తమ అభ్యర్థులను నామినేషన్లు వేయకుండా అధికార టీడీపీ(TDP) శ్రేణులు భయభ్రాంతులకు గురిచేశాయని, చివరికి ఎంపీ మిథున్ రెడ్డిపై కూడా కర్రలు, రాళ్లతో దాడికి తెగబడ్డారని వైసీపీ తీవ్రస్థాయిలో మండిపడింది. రక్షణ కల్పించాల్సిన యంత్రాంగం కూడా అధికార పార్టీకి కొమ్ముకాస్తోందని, ఇలాంటి అప్రజాస్వామిక వాతావరణంలో ఎన్నికలకు వెళ్లడం వృథా అని ఆ పార్టీ నేతలు భావించారు. ఈ నేపథ్యంలోనే ఎన్నికలను బహిష్కరిస్తున్నట్లు స్పష్టం చేశారు.

మరోవైపు ఈ వివాదంపై అధికార ప్రతిపక్షాల మధ్య మాటల యుద్ధం తారాస్థాయికి చేరింది. నిబంధనలను బేఖాతరు చేస్తూ వందలాది కార్లతో ఎంపీ మిథున్ రెడ్డి కాన్వాయ్‌గా రావడంతోనే ఉద్రిక్తతలు చెలరేగాయని టీడీపీ నేతలు, పోలీసులు వాదిస్తున్నారు. ఈ ఘటనకు సంబంధించి ఇప్పటికే ఎంపీ మిథున్ రెడ్డి(Mithun Reddy)పై నాలుగు వేర్వేరు కేసులు నమోదవ్వగా, అన్నింట్లోనూ ఆయనే ప్రధాన నిందితుడిగా (ఏ-1) ఉండటం గమనార్హం. శాంతిభద్రతలను అదుపులో ఉంచేందుకు పోలీసులు పుంగనూరులోకి ఎంట్రీ ఇవ్వొద్దంటూ ఎంపీ మిథున్ రెడ్డి, ఎమ్మెల్యే పెద్దిరెడ్డికి నోటీసులు కూడా జారీ చేశారు.

ప్రస్తుతం పుంగనూరు(Punganur) పట్టణమంతా పోలీసుల అదుపులో ఉంది. ఎక్కడ ఏం జరుగుతుందోనని స్థానికులు బెంబేలెత్తుతుండగా, హైటెన్షన్ వాతావరణం నెలకొంది. నామినేషన్ల గడువు ముగియడానికి ముందే ప్రధాన ప్రతిపక్షం ఇలా ఎన్నికల నుంచి తప్పుకోవడం రాజకీయ సమీకరణాలపై తీవ్ర ప్రభావం చూపనుంది. ఈ పరిణామాలు రాబోయే రోజుల్లో ఎలాంటి మలుపులు తిరుగుతాయనేది ఇప్పుడు ఆసక్తికరంగా మారింది.