సినిమా థియేటర్లలో ఈలలు, గోలలు, కటౌట్లకు పాలాభిషేకాలు.. ఫ్యాన్ అసోసియేషన్స్ అనగానే మనందరికీ ముందుగా గుర్తొచ్చే దృశ్యాలు ఇవే. తమ హీరో సినిమా వస్తోందంటే చాలు సోషల్ మీడియాలో రచ్చ చేయడం, ఫస్ట్ డే కలెక్షన్ల కోసం హంగామా చేయడం ఇప్పటివరకు మనం చూసిన, చూస్తున్న తంతు. కానీ, ట్రెండ్‌కు తగ్గట్టుగా అల్లు అర్జున్ అభిమాన సంఘం (AAFA) మాత్రం ఇప్పుడు పూర్తిగా రూటు మార్చింది. కేవలం వెండితెర మీద హీరో విజువల్స్ చూసి మురిసిపోవడమే కాదు, సమాజానికి ఉపయోగపడే సంచలన కార్యక్రమాలతో తామేంటో నిరూపించుకుంటున్నారు.

పాన్-ఇండియా రేంజ్‌లో అల్లు అర్జున్(Allu Arjun) క్రేజ్ ఏ స్థాయికి దూసుకెళ్తుందో ప్రత్యేకంగా చెప్పనవసరం లేదు. అదే రేంజ్‌లో ఆయన ఫ్యాన్ నెట్‌వర్క్ కూడా ఇప్పుడు దేశవ్యాప్తంగా విస్తరించింది. అయితే ఈ విపరీతమైన ఫ్యాన్ పవర్‌ను కేవలం ఆన్‌లైన్ వార్లకో, ట్రెండ్స్‌కో పరిమితం చేయకుండా నేరుగా గ్రౌండ్‌లోకి తీసుకువచ్చారు AAFA వాలంటీర్లు. సోషల్ మీడియాలో పోస్టులు పెట్టి చేతులు దులుపుకోకుండా, ఏకంగా రంగంలోకి దిగి చేసిన సాహసోపేతమైన కార్యక్రమం ఇప్పుడు అందరి దృష్టిని ఆకర్షిస్తోంది. 

సమాజంలో అత్యంత కీలకమైన, కానీ చాలామంది మాట్లాడటానికి జంకే హెచ్‌పీవీ (హ్యూమన్ పాపిలోమా వైరస్) అవగాహన క్యాంపెయిన్‌ను బన్నీ ఫ్యాన్స్ భుజాన వేసుకున్నారు. కేవలం ఒక్క రాష్ట్రానికే పరిమితం కాకుండా.. ఆంధ్రప్రదేశ్(Andhra Pradesh), తెలంగాణ, ఒడిశా, తమిళనాడు, కేరళ, మహారాష్ట్ర, కర్ణాటక, అండమాన్ అండ్ నికోబార్ దీవులు.. ఇలా ఏకంగా ఎనిమిది రాష్ట్రాలు, కేంద్రపాలిత ప్రాంతాలలో ఈ బృహత్తర కార్యక్రమాన్ని విజయవంతంగా నిర్వహించారు. ఈ క్యాంపెయిన్‌లో భాగంగా అల్లు అర్జున్ అభిమానులు ఏకంగా 820 పాఠశాలలను సందర్శించారు. నేరుగా విద్యార్థినుల వద్దకు వెళ్లి, వారితో మమేకమై హెచ్‌పీవీ నివారణ, వ్యాక్సినేషన్ ప్రాముఖ్యతపై అవగాహన కల్పించారు. సరైన వైద్య సలహాల కోసం క్వాలిఫైడ్ హెల్త్‌కేర్ ప్రొఫెషనల్స్‌ను సంప్రదించాలని మార్గనిర్దేశం చేశారు. ఈ అద్భుతమైన ప్రణాళిక ద్వారా దాదాపు 3 లక్షల మంది బాలికలకు చేరువయ్యారు.

"అభిమానం అనేది కేవలం ఒక హీరోని ఆరాధించడం కాదు.. ఆ హీరో బాటలో నడుస్తూ సమాజానికి మంచి చేయడం." ఈ నినాదానికి అసలు సిసలు అర్థంలా అల్లు అర్జున్ ఫ్యాన్స్ ఈ కార్యక్రమంతో నిరూపించారు. సినిమాలతో ప్రేక్షకులను అలరించే తమ అభిమాన నటుడి పేరును, ఇలాంటి సామాజిక సేవలతో మరింత ఉన్నత స్థాయికి తీసుకువెళ్తున్నారు. కేవలం వినోదాన్ని పంచే తారల అభిమానులుగానే కాకుండా, సమాజ మార్పునకు బాటలు వేసే రియల్ హీరోలుగా AAFA సభ్యులు తీసుకున్న ఈ నిర్ణయం నిజంగానే అందరిచేత శభాష్ అనిపించుకుంటోంది.