దేశం కోసం ప్రాణాలొదిలే సైనికుల కుటుంబాలను ఆదుకోవడంలోనే అసలైన సంతృప్తి ఉంటుందని నిరూపించారు రాజ్యసభ సభ్యులు చింతకాయల విజయ్(Chintakayala Vijay). పదవి చేపట్టిన తొలిసారే ఆయన తీసుకున్న ఒక గొప్ప నిర్ణయం ప్రస్తుతం సోషల్ మీడియాలో హాట్ టాపిక్‌గా మారింది. రాజకీయాల్లో కేవలం పదవులు, హోదాల కోసమే కాకుండా, ప్రజాసేవకు, దేశభక్తికి పెద్దపీట వేయవచ్చని ఆయన మరోసారి రుజువు చేశారు.

తాజాగా ఢిల్లీలో కేంద్ర రక్షణ శాఖ మంత్రి రాజ్‌నాథ్ సింగ్‌(Rajnath Singh)ను మర్యాదపూర్వకంగా కలిసిన విజయ్.. తన తొలి నెల జీతానికి సంబంధించిన మూడు లక్షల రూపాయల చెక్కును ఆయనకు అందజేశారు. ఈ విరాళాన్ని దేశ రక్షణలో వీరమరణం పొందిన అమర జవాన్ల కుటుంబాల సంక్షేమం కోసం వినియోగించాలని ఆయన కోరారు.

సరిహద్దుల్లో శత్రువులతో పోరాడుతూ అసువులు బాసిన సైనికుల కుటుంబాలకు అండగా నిలవడం ప్రతి ఒక్కరి ప్రథమ కర్తవ్యమని విజయ్(Vijay) ఈ సందర్భంగా పేర్కొన్నారు. ఎంపీగా అడుగుపెట్టిన తొలి క్షణం నుంచే తన సంపాదనను దేశం కోసం, సైనిక కుటుంబాల సంక్షేమం కోసం కేటాయించడం పట్ల సర్వత్రా ప్రశంసలు వెల్లువెత్తుతున్నాయి. యువ నాయకుడి ఈ విశాల దృక్పథం, దేశభక్తి చూసి రాజకీయ విశ్లేషకులు సైతం ఆశ్చర్యపోతున్నారు. సోషల్ మీడియా వేదికగా ఈ వార్త వైరల్ కావడంతో, నెటిజన్లు ఆ యువ ఎంపీపై ప్రశంసల వర్షం కురిపిస్తున్నారు.