ఏపీ రాజకీయాల్లో అధికార, ప్రతిపక్షాల మధ్య వ్యూహాలు వేగంగా మారుతున్నాయి. ముఖ్యంగా స్థానిక సంస్థల ఎన్నికలను అన్ని ప్రధాన పార్టీలు అత్యంత ప్రతిష్టాత్మకంగా తీసుకుంటున్నాయి. ఈ తరుణంలో వైసీపీ అధినేత వైఎస్ జగన్‌మోహన్‌రెడ్డి పార్టీ ప్రక్షాళనపై దృష్టి పెట్టారు. నియోజకవర్గాల వారీగా సమీక్షలు నిర్వహిస్తూ, కీలక పదవుల్లో మార్పులు చేర్పులు చేపడుతున్నారు. అయితే, ఈ మార్పులు కొన్ని చోట్ల పార్టీకి మేలు చేసే బదులు, అంతర్గత కుమ్ములాటలకు దారితీస్తున్నట్లు కనిపిస్తోంది. సరిగ్గా ఇదే పరిస్థితి ఇప్పుడు మంత్రి నారా లోకేష్(Nara Lokesh) ప్రాతినిధ్యం వహిస్తున్న మంగళగిరి నియోజకవర్గంలో స్పష్టంగా కనిపిస్తోంది.

మంగళగిరిలో టీడీపీ(TDP) జెండా పాతిన నారా లోకేష్ అటు ప్రభుత్వ పాలనలోనూ, ఇటు స్థానిక ప్రజలతో మమేకమవుతూ అజేయ శక్తిగా ఎదుగుతున్నారు. మరోవైపు ఇక్కడ వైసీపీ పరిస్థితి పూర్తిగా దారుణంగా తయారైంది. గత ఎన్నికల్లో ఓడిపోయిన నాటి నుంచి పార్టీ నేతలు ఎవరి దారిన వారు వెళ్లడంతో క్షేత్రస్థాయిలో కేడర్ నైతిక స్థైర్యం కోల్పోయింది. ఈ బలహీనతను కప్పిపుచ్చుకోవడానికి అధిష్టానం తాజాగా ఓ కొత్త ప్రయోగానికి తెరలేపింది. ఇప్పటివరకు పార్టీ బాధ్యతలు మోస్తున్న పాత నేతలను పక్కన పెట్టి, రియల్ ఎస్టేట్ వ్యాపారి, ఆర్థికంగా బలమైన వ్యక్తిగా పేరున్న బుర్రముక్కు వేణుగోపాల సోమిరెడ్డికి మంగళగిరి సమన్వయకర్త బాధ్యతలను అప్పగించింది.

అయితే, జగన్ తీసుకున్న ఈ నిర్ణయం మంగళగిరి వైసీపీ(YCP)లో తీవ్ర అగ్గిరాజేసింది. కష్టకాలంలో పార్టీని అంటిపెట్టుకుని ఉండి, క్షేత్రస్థాయిలో శ్రమించిన దొంతిరెడ్డి వేమారెడ్డి వర్గం ఈ మార్పును తీవ్రంగా వ్యతిరేకిస్తోంది. తొలి నుంచి పార్టీ కోసం చెమటోడ్చిన తమను కాదని, ఎలాంటి రాజకీయ నేపథ్యం లేని కొత్త వ్యక్తికి పదవి కట్టబెట్టడంపై వారు ఆగ్రహం వ్యక్తం చేస్తున్నారు. ప్రజాదారణ ఉన్న నాయకుల కోసం వెతకడం మానేసి, కేవలం ఎన్నికల్లో బోలెడన్ని డబ్బులు ఖర్చు పెడతారనే ఏకైక అర్హతతోనే హైకమాండ్ ఈ నిర్ణయం తీసుకుందనే గుసగుసలు ఇప్పుడు పార్టీ వర్గాల్లోనే జోరుగా వినిపిస్తున్నాయి.

మంగళగిరి(Mangalagiri) లాంటి హైప్రొఫైల్ నియోజకవర్గంలో లోకేష్ బలమైన ప్రజాదారణను ఎదుర్కొనేందుకు మాస్టర్ ప్లాన్ వేయాల్సిన వైసీపీ అధిష్టానం, ఇలా ఆర్థిక బలమే ప్రాతిపదికగా పావులు కదపడం సొంత పార్టీ నేతలకే మింగుడుపడటం లేదు. అధినేత వేసిన ఈ ప్లాన్ వర్కౌట్ కాకపోగా, ఇటు సొంత పార్టీలో వర్గపోరును మరింత పెంచిందని రాజకీయ విశ్లేషకులు భావిస్తున్నారు. మొత్తానికి, లోకేష్ అడ్డాను కైవసం చేసుకునేందుకు జగన్ వేసిన ఈ కొత్త ఎత్తుగడ.. ప్రస్తుతం వైసీపీలో మరోసారి పెద్ద లొల్లే రేపుతోంది.