భారత రాజకీయ చరిత్రలో ఎన్నడూ లేని విధంగా ఒక వినూత్న పరిణామం చోటుచేసుకుంది. దేశాన్ని పాలిస్తున్న ప్రధాని నరేంద్ర మోదీపై తమకున్న అపారమైన అభిమానాన్ని చాటుకునేందుకు ఒక ప్రత్యేక వర్గం ఏకంగా గుడి కట్టాలని నిర్ణయించుకుంది. సాధారణంగా నాయకుల విగ్రహాలు, ఫ్లెక్సీలు కామన్ అయినప్పటికీ, ఏకంగా ప్రధాని నరేంద్ర మోదీ(PM Narendra Modi) పేరుతో భారీ ఆలయాన్ని నిర్మించనుండటం ఇప్పుడు దేశవ్యాప్తంగా హాట్ టాపిక్ అయింది.

ఇంతకీ ఈ భారీ ప్రాజెక్ట్ ఎక్కడో తెలుసా? మరేదో కాదు, బిహార్ రాజధాని పాట్నా నగరంలో ఈ అరుదైన ఘట్టానికి రంగం సిద్ధమవుతోంది. బిహార్(Bihar) ట్రాన్స్‌జెండర్ సంక్షేమ బోర్డు ఇటీవల నిర్వహించిన సమావేశంలో ప్రధాని మోదీకి ఆలయం నిర్మించాలనే ప్రతిపాదనను ముందుకు తెచ్చింది. బోర్డు సభ్యుడు డాక్టర్ రాజన్ సింగ్ ప్రవేశపెట్టిన ఈ తీర్మానానికి సభ్యులందరూ ఏకగ్రీవంగా మద్దతు తెలిపారు.  

సుమారు రూ. 112 కోట్ల భారీ అంచనా వ్యయంతో, పాట్నా నగరంలో దాదాపు 5 ఎకరాల విశాలమైన స్థలంలో ఈ ఆలయ సముదాయాన్ని రూపొందించాలని ప్రణాళికలు రచిస్తున్నారు. కేవలం నిర్మాణం మాత్రమే కాకుండా, ఈ ఆలయంలో ప్రధాని మోదీ(PM Modi)కి సంబంధించిన నిలువెత్తు బంగారు విగ్రహాన్ని ప్రతిష్ఠించనున్నట్లు బోర్డు వర్గాలు వెల్లడించాయి.  

సమాజంలో తమకు గుర్తింపు, చట్టపరమైన హక్కులు, భద్రత కల్పించిన కేంద్ర ప్రభుత్వ ‘ట్రాన్స్‌జెండర్ వ్యక్తుల హక్కుల పరిరక్షణ చట్టం-2019(Transgender Welfare)’ చొరవ వెనుక మోదీ ఉన్నారని ఆ వర్గం భావిస్తోంది. తమ జీవితాల్లో వెలుగులు నింపిన నాయకుడికి కృతజ్ఞతగా ఈ ఆలయం నిర్మిస్తున్నట్లు వారు చెబుతున్నారు. త్వరలోనే రాష్ట్ర ప్రభుత్వం నుంచి అధికారిక భూ కేటాయింపులు జరగగానే పనులు పట్టాలెక్కనున్నాయి. అయితే, ఈ భారీ ఖర్చుతో కూడిన ప్రాజెక్ట్‌పై సోషల్ మీడియాలో భిన్నాభిప్రాయాలు వ్యక్తమవుతున్నాయి. ఒకవైపు కృతజ్ఞతా భావానికి ప్రతీకగా ఇది నిలుస్తుందని కొందరు అంటుంటే, ఆ నిధులను విద్య, ఉపాధికి వెచ్చిస్తే బాగుంటుందని మరికొందరు వాదిస్తున్నారు. ఏది ఏమైనా, మోదీ గుడి వార్త మాత్రం ప్రస్తుతం రాజకీయ వర్గాల్లో తీవ్ర చర్చనీయాంశమైంది.