తెలుగు నాట సినిమా, రాజకీయం ఎప్పుడూ వేర్వేరు కావు. కానీ ఇటీవల కాలంలో ఈ రెండింటినీ ముడిపెడుతూ సాగుతున్న కొన్ని ప్రచారాలు టాలీవుడ్‌తో పాటు రాజకీయ వర్గాల్లో తీవ్ర సంచలనంగా మారాయి. ఐకాన్ స్టార్ అల్లు అర్జున్ సొంత పొలిటికల్ పార్టీ పెట్టబోతున్నారంటూ మొన్న, యంగ్ టైగర్ జూనియర్ ఎన్టీఆర్(Jr NTR) కొత్త కుంపటి పెట్టబోతున్నారంటూ నిన్న సోషల్ మీడియాలో భారీ ఎత్తున పోస్టులు వెలిశాయి. అసలు ఈ ప్రచారం వెనుక ఉన్న అసలు శక్తులు ఎవరు? తామెక్కడా ఇలాంటి వ్యాఖ్యలు చేయకపోయినా, ఈ ఇద్దరు గ్లోబల్ స్టార్లను రాజకీయ బురదలోకి లాగడం ద్వారా లాభపడేది ఎవరు?

కొద్దిరోజుల క్రితం సోషల్ మీడియా వేదికగా అల్లు అర్జున్(Allu Arjun) కొత్త రాజకీయ పార్టీ పెట్టబోతున్నారంటూ ఒక ప్రచారం ఊపందుకుంది. బన్నీ గనుక పార్టీ పెడితే ఏపీలో ఒక బలమైన సామాజికవర్గ ఓట్లు చీలుతాయని, ఇది జనసేన పార్టీకి కోలుకోలేని రాజకీయ దెబ్బ అవుతుందంటూ విశ్లేషణలు గుప్పించారు. వాస్తవానికి అల్లు అర్జున్ తన సినిమాలతో దేశవ్యాప్తంగా బిజీగా ఉన్నారు. ఆయన కుటుంబానికి ఇప్పటికే ఒక స్పష్టమైన రాజకీయ నేపథ్యం ఉంది. అయినప్పటికీ, జనసేనాని పవన్ కళ్యాణ్ లక్ష్యంగా అల్లు అర్జున్ పేరును వాడుకుంటూ కొందరు సోషల్ మీడియాలో భారీ వ్యూహాన్ని నడిపించారు. ఇదంతా పవన్ కళ్యాణ్‌ను రాజకీయంగా బలహీనపరిచేందుకేనని రాజకీయ విశ్లేషకులు భావిస్తున్నారు.

ఇక ఇదే తరుణంలో జూనియర్ ఎన్టీఆర్ పేరు కూడా తెరపైకి వచ్చింది. తారక్ త్వరలోనే సొంత రాజకీయ పార్టీని ప్రకటించబోతున్నారని, దీంతో తెలుగుదేశం పార్టీ (TDP) రాజకీయ పతనం ఖాయమంటూ ప్రత్యర్థి వర్గాలు నానా హంగామా సృష్టించాయి. మరీ ముఖ్యంగా ‘RAW NTR’ పేరుతో వస్తున్న కొన్ని ప్రకటనలు, స్వచ్ఛంద కార్యక్రమాల పోస్టర్లు ఈ ఊహాగానాలకు మరింత ఆజ్యం పోశాయి. వ్యవహారం కాస్తా చేతులు దాటిపోతుండటంతో.. చివరకు జూనియర్ ఎన్టీఆర్ కార్యాలయం అధికారికంగా స్పందించాల్సి వచ్చింది. ఆ ప్రకటనలకు, తారక్‌కు ఎటువంటి సంబంధం లేదంటూ వారు వివరణ ఇచ్చారు. అయినప్పటికీ ప్రత్యర్థి సోషల్ మీడియా సైన్యం మాత్రం ఈ ప్రచారాన్ని ఆపడం లేదు.

ఇక్కడ అసలైన ప్రశ్న ఏమిటంటే.. సినిమాలతో అంతర్జాతీయ స్థాయిలో గుర్తింపు తెచ్చుకుంటూ, రాజకీయాలకు పూర్తి దూరంగా ఉంటున్న ఈ ఇద్దరు స్టార్ హీరోల పేర్లను తెరపైకి తెచ్చి రాజకీయం చేస్తున్న ఆ మాస్టర్ మైండ్స్ ఎవరు? ఏపీ(AP)లో అధికారంలో ఉన్న కూటమి (టీడీపీ, జనసేన) పార్టీలను టార్గెట్ చేయడం ద్వారా ఎవరికి రాజకీయ మైలేజ్ లభిస్తుంది? తమ ప్రత్యర్థులను నేరుగా ఎదుర్కోలేక, ఇలా స్టార్ హీరోల ఇమేజ్‌ను వాడుకుని వారి అభిమానుల్లో చీలికలు తెచ్చే కుట్ర జరుగుతోందన్నది సుస్పష్టం.

సినిమా అభిమానాన్ని రాజకీయ స్వార్థానికి వాడుకోవాలనుకోవడం పాత పద్ధతే అయినా, ఈ స్థాయిలో తప్పుడు ప్రచారాలు చేయడం మాత్రం ఇండస్ట్రీలో చర్చనీయాంశంగా మారింది. అటు నందమూరి కుటుంబం, ఇటు మెగా-అల్లు కుటుంబాలు ఇప్పటికే రాజకీయంగా స్థిరపడిపోయి ఉన్నాయి. ఇలాంటి తరుణంలో బన్నీ, తారక్(Tarak) పేర్లతో కొత్త పార్టీలంటూ పుకార్లు పుట్టించడం కేవలం అధికార పక్షాన్ని ఇరకాటంలో పెట్టేందుకేనని స్పష్టమవుతోంది. మరి ఈ సోషల్ మీడియా వైరస్ కు త్వరలోనే హీరోల అభిమానులు గట్టి కౌంటర్ ఇస్తారేమో చూడాలి.