రాజకీయాల్లో శాశ్వత శత్రువులు, శాశ్వత మిత్రులు ఉండరనేది ఎంత నిజమో.. ఏ క్షణంలో ఏ రాజకీయ నాయకుడు ఎలాంటి వ్యూహం అమలు చేస్తాడో ఊహించడం కూడా అంతకంటే కష్టం. ఇప్పుడు సరిగ్గా ఇదే తరహా సస్పెన్స్ క్రియేట్ చేస్తున్నారు వైఎస్సార్ కాంగ్రెస్ పార్టీ కీలక నేత, మాజీ ఎంపీ వి. విజయసాయిరెడ్డి(Vijayasai Reddy). గత కొంతకాలంగా తాను క్రియాశీల రాజకీయాలకు, పార్లమెంట్ పదవులకు దూరంగా ఉంటానని ప్రకటిస్తూ వస్తున్న ఈ సీనియర్ లీడర్.. ఉన్నట్టుండి జార్ఖండ్ రాజ్యసభ ఎన్నికల సీన్‌లోకి ఎంట్రీ ఇవ్వడం దేశ రాజకీయ వర్గాల్లో హాట్ టాపిక్‌గా మారింది. ఏపీ రాజకీయాల్లో చక్రం తిప్పిన విజయసాయిరెడ్డి, ఇప్పుడు ఏకంగా జార్ఖండ్ వైపు చూపు సారించడం వెనుక ఉన్న అసలు మాస్టర్ ప్లాన్ ఏంటనే చర్చ జోరందుకుంది.

జార్ఖండ్(Jharkhand) రాజ్యసభ నామినేషన్ల ప్రక్రియ ముగింపు దశకు చేరిన వేళ, విజయసాయిరెడ్డి అక్కడ నామినేషన్ పత్రాలు కొనుగోలు చేయడం పెను సంచలనంగా మారింది. అసలు జార్ఖండ్‌తో నేరుగా ఎలాంటి సంబంధం లేని ఒక ఏపీ టాప్ లీడర్, అక్కడి పెద్దల సభ ఎన్నికల్లో ఆసక్తి చూపించడం వెనుక బలమైన రాజకీయ కారణాలు ఉన్నాయనే అనుమానాలు వ్యక్తమవుతున్నాయి. ప్రస్తుతం అక్కడ రిలయన్స్ గ్రూప్ ప్రెసిడెంట్ పరిమళ్ నత్వానీ స్వతంత్ర అభ్యర్థిగా బరిలోకి దిగి సమీకరణాలను పూర్తిగా మార్చేశారు. నత్వానీకి బీజేపీ నేతృత్వంలోని ఎన్డీయే కూటమి పూర్తి మద్దతు ఇస్తోంది. ఇలాంటి టైట్‌ ఫైట్‌లో విజయసాయిరెడ్డి నామినేషన్ ఫామ్స్ తీసుకోవడం వెనుక లోతైన పొలిటికల్ మైండ్ గేమ్ నడుస్తోందని విశ్లేషకులు భావిస్తున్నారు.

అయితే, ఈ ట్విస్ట్‌కు ఇక్కడే ఎండ్ కార్డ్ పడటం లేదు. జార్ఖండ్‌లో మొత్తం రెండు రాజ్యసభ స్థానాలు ఉండగా.. అధికార ఇండియా కూటమి (జేఎమ్‌ఎమ్, కాంగ్రెస్) ఆ రెండింటినీ దక్కించుకోవాలని చూసింది. కానీ, పరిమళ్ నత్వానీ(Parimal Nathwani) ఎంట్రీతో కాంగ్రెస్ అభ్యర్థి ప్రణవ్ ఝా విజయం ప్రమాదంలో పడింది. ఇలాంటి ఉత్కంఠభరిత వాతావరణంలో విజయసాయిరెడ్డి రంగంలోకి దిగడం వెనుక ఓట్ల చీలికను ప్రభావితం చేసే వ్యూహం ఉందా, లేక తెరవెనుక మరేదైనా కార్పొరేట్ డీల్ నడుస్తోందా అనేది మిస్టరీగా మారింది. నత్వానీకి లైన్ క్లియర్ చేయడానికి, అధికార కూటమిని ఒత్తిడిలోకి నెట్టడానికే విజయసాయిరెడ్డి ఈ ఎత్తుగడ వేశారని, చివరి నిమిషంలో ఆయన వెనక్కి తగ్గే అవకాశం ఉందనే ప్రచారం కూడా గట్టిగా సాగుతోంది. ఏదేమైనా, ఏపీ వదిలి జార్ఖండ్‌కు విజయసాయిరెడ్డి వేసిన ఈ అడుగు.. జాతీయ రాజకీయాల్లో సరికొత్త రసవత్తర చర్చకు తెరలేపింది.