ఆంధ్రప్రదేశ్ ముఖ్యమంత్రి నారా చంద్రబాబు నాయుడు(CM Chandrababu Naidu) మళ్లీ తన మార్క్ స్పీడ్‌తో అందరినీ ఆశ్చర్యపరిచారు. వయసు కేవలం అంకె మాత్రమేనని, సంకల్పం ఉంటే ఏదైనా సాధ్యమేనని ఆయన మరోసారి నిరూపించారు. ప్రపంచ పర్యావరణ దినోత్సవాన్ని పురస్కరించుకుని వైజాగ్‌లో సాగిన ఆయన సైకిల్ ప్రయాణం ఇప్పుడు సోషల్ మీడియాలో హాట్ టాపిక్‌గా మారింది. 70 ఏళ్లు దాటినా యువకులకు సైతం సవాల్ విసిరేలా ఆయన సాగించిన రైడ్ చూసి సొంత పార్టీ నేతలే కాదు, సామాన్య జనం కూడా నోరెళ్లబెడుతున్నారు.

ఉదయం వేళ విశాఖ నగరంలో ఎండ తీవ్రత గట్టిగానే ఉన్నప్పటికీ, చంద్రబాబు ముఖంలో ఎక్కడా అలసట కనిపించలేదు. ఆంధ్ర యూనివర్సిటీ(Andhra University) మైదానం నుంచి మొదలైన ఈ సైకిల్ ర్యాలీ.. త్రీ టౌన్ పోలీస్ స్టేషన్, పోలమాంబ గుడి, వాల్తేరు మీదుగా ప్రముఖ బీచ్ రోడ్డులోని నోవాటెల్ హోటల్ వరకు సాగింది. మొత్తం 5.5 కిలోమీటర్ల సుదీర్ఘ దూరాన్ని ఆయన కేవలం 21 నిమిషాల 18 సెకన్లలోనే పూర్తి చేయడం విశేషం. బాబు సైకిల్ తొక్కుతున్న వేగాన్ని అందుకోవడానికి వెనుక ఉన్న యువ ప్రజాప్రతినిధులు, అధికారులు కాస్త చెమటోడ్చాల్సి వచ్చింది.

సరిగ్గా పర్యావరణ దినోత్సవం రోజున ప్రకృతిని కాపాడుకోవాలనే గొప్ప సందేశంతో సాగిన ఈ యాత్రకు వైజాగ్ ప్రజల నుంచి అపూర్వ స్పందన లభించింది. దారిపొడవునా రోడ్డుకు ఇరువైపులా నిలబడిన ప్రజలకు చంద్రబాబు నవ్వుతూ, చేతులెత్తి అభివాదం చేస్తూ ఉత్సాహంగా ముందుకు సాగారు. ముఖ్యమంత్రి స్వయంగా రంగంలోకి దిగి సైకిల్ తొక్కడంతో.. ఆయన వెనుక టీడీపీ(TDP) నాయకులు, ప్రభుత్వ అధికారులు, భారీ సంఖ్యలో ప్రజలు కూడా సైకిళ్లతో ర్యాలీలో సందడి చేశారు.

కాలుష్యాన్ని తగ్గించి, కాబోయే తరాలకు పచ్చని పర్యావరణాన్ని అందించాలనే బలమైన సందేశాన్ని ప్రజల్లోకి తీసుకెళ్లడమే లక్ష్యంగా ఈ కార్యక్రమం సాగింది. ఒక రాష్ట్రానికి ముఖ్యమంత్రి అయి ఉండి, అంతటి బిజీ షెడ్యూల్‌లోనూ పర్యావరణం కోసం ఇలా రోడ్డుపైకి రావడం అందరినీ ఆలోచింపజేసేలా చేసింది. మొత్తానికి వైజాగ్(Vizag) బీచ్ రోడ్డు సాక్షిగా చంద్రబాబు చేసిన ఈ సైకిల్ సవారీ.. పర్యావరణ ప్రేమికుల్లో కొత్త జోష్ నింపడమే కాకుండా, ఆయన ఫిట్‌నెస్‌కు ఒక బ్రాండ్ అంబాసిడర్‌లా నిలిచింది.

https://x.com/JaiTDP/status/2062785090493788280?s=20