భారత విమానయాన రంగం మునుపెన్నడూ లేని విధంగా దూసుకుపోతోంది. ఒకప్పుడు విమాన ప్రయాణం అంటే కేవలం సంపన్నులకే పరిమితం అనే ముద్ర ఉండేది. కానీ ఇప్పుడు ఆ పరిస్థితి మారుతోంది. తాజాగా విశాఖపట్నంలో జరిగిన ఒక కార్యక్రమంలో కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు(Kinjarapu Ram Mohan Naidu) చేసిన వ్యాఖ్యలు సామాన్య ప్రయాణికుల్లో కొత్త ఆశలు చిగురింపజేస్తున్నాయి.

దేశంలో విమానయాన మౌలిక సదుపాయాల కల్పన ఏ స్థాయిలో జరుగుతుందో మంత్రి వివరించారు. దేశవ్యాప్తంగా సగటున ప్రతీ 45 రోజులకో కొత్త విమానాశ్రయాన్ని ప్రారంభిస్తున్నామని ఆయన కీల‌క ప్ర‌క‌ట‌న చేశారు. ఎన్డీయే(NDA) ప్రభుత్వం అధికారంలోకి వచ్చిన నాటి నుండి ఎయిర్‌పోర్టుల సంఖ్య గణనీయంగా పెరిగి 167కు చేరుకోవడం ఒక మైలురాయిగా అభివర్ణించారు. కేవలం మెట్రో నగరాలకే పరిమితం కాకుండా, టైర్-2, టైర్-3 నగరాలకు కూడా విమాన సర్వీసులను విస్తరించడమే లక్ష్యంగా ప్రభుత్వం పనిచేస్తోందని ఆయన స్పష్టం చేశారు.

ప్రభుత్వం ప్రతిష్టాత్మకంగా చేపట్టిన ఉడాన్(UDAN) పథకం విమానయాన రంగంలో గేమ్ ఛేంజర్‌గా మారిందని రామ్మోహన్ నాయుడు పేర్కొన్నారు. ఈ పథకం ద్వారా చిన్న పట్టణాలకు కూడా విమాన సర్వీసులు అందుబాటులోకి రావడంతో, మధ్యతరగతి ప్రజలు అత్యంత తక్కువ ఖర్చుతో ప్రయాణించే అవకాశం లభిస్తోందని చెప్పారు. విమాన ప్రయాణాన్ని ఒక విలాసంగా కాకుండా, సామాన్యుడి అత్యవసర అవసరంగా ప్రభుత్వం పరిగణిస్తోందని ఆయన తెలిపారు.

విమాన ప్రయాణికులకు మరో శుభవార్త చెబుతూ.. త్వరలోనే భారత్‌(India)లో విమానాల తయారీ ప్రారంభం కానుందని మంత్రి ఆశాభావం వ్యక్తం చేశారు. ప్రస్తుతం విమానాల విడిభాగాలు లేదా మెయింటెనెన్స్ కోసం విదేశీ కంపెనీలపై ఆధారపడుతున్నామని, దేశీయంగా తయారీ మొదలైతే నిర్వహణ ఖర్చులు తగ్గి డొమెస్టిక్ విమాన ఛార్జీలు భారీగా తగ్గే అవకాశం ఉందని ఆయన విశ్లేషించారు. దీనివల్ల విదేశీ మారక ద్రవ్యం ఆదా అవ్వడమే కాకుండా, స్థానికంగా యువతకు భారీగా ఉపాధి అవకాశాలు లభిస్తాయని చెప్పారు.

ముఖ్యంగా ఆంధ్రప్రదేశ్(Andhra Pradesh), తెలంగాణ రాష్ట్రాల్లో విమానయాన రంగాన్ని బలోపేతం చేసేందుకు కేంద్ర, రాష్ట్ర ప్రభుత్వాలు సమన్వయంతో ముందుకు సాగుతున్నాయని మంత్రి వెల్లడించారు. భవిష్యత్తులో మరిన్ని కొత్త రూట్లు, సర్వీసులు అందుబాటులోకి రానున్నాయని, తద్వారా తెలుగు రాష్ట్రాల ఆర్థికాభివృద్ధికి విమానయాన రంగం వెన్నుముకగా నిలుస్తుందని ఆయన పేర్కొన్నారు.