గెలుపు ఓటములు రాజకీయాల్లో సహజమే. కానీ, ఓడిపోయాక ఎవరైనా ఏం చేస్తారు? మౌనంగా ఉండిపోతారు లేదంటే కనీసం ఓటమికి గల కారణాలపై ఆత్మవిమర్శ చేసుకుంటారు. కానీ, పలమనేరు మున్సిపాలిటీకి చెందిన ఒక వైసీపీ(YCP) అభ్యర్థి మాత్రం ఇవేవీ చేయలేదు. ఏకంగా ఓటర్లకే షాకిచ్చి సోషల్ మీడియాలో హాట్ టాపిక్ అయ్యాడు. "నేను పంచిన డబ్బులు నాకు వెంటనే వెనక్కి ఇచ్చేయండి" అంటూ ఆయన చేసిన వీరంగం ఇప్పుడు నెట్టింట నవ్వులు పూయిస్తోంది.

వివరాల్లోకి వెళ్తే.. చిత్తూరు జిల్లా(Chittoor District) పలమనేరు మున్సిపాలిటీ 32వ వార్డు నుంచి వైసీపీ తరఫున బరిలోకి దిగిన ప్రసాద్ రెడ్డి గెలుపుపై గంపెడాశలు పెట్టుకున్నారు. కానీ, రిజల్ట్ వచ్చేసరికి జనసేన అభ్యర్థి చేతిలో సుమారు 350 ఓట్ల తేడాతో చిత్తుగా ఓడిపోయారు. ఇక్కడి వరకు అంతా బాగానే ఉంది కానీ అసలు సినిమా ఇక్కడే మొదలైంది. ఎన్నికల్లో గెలవడం కోసం ఆయన ఏకంగా రూ.10 వడ్డీకి రూ.10 లక్షలు అప్పు తెచ్చి మరీ ఖర్చుపెట్టారట. ప్రతీ ఇంటికీ వెళ్లి ఓటుకు వెయ్యి చొప్పున పంపిణీ చేశానని ఆయనే స్వయంగా ఓపెన్‌గా ఒప్పుకున్నారు.

మరి ఇంత ఖర్చు పెట్టినా జనం ఎందుకు ఓటెయ్యలేదో ఏమో కానీ, ప్రసాద్ రెడ్డి(Prasad Reddy)కి పిచ్చెక్కినంత పనైంది. "డబ్బులు తీసుకుని మరీ నాకు ఓటెయ్యకుండా మోసం చేస్తారా? నాకు పడాల్సిన ఆ డబ్బులన్నీ తక్షణమే రిటర్న్ చేసేయండి. లేదంటే మీ ఇళ్ల ముందే బైఠాయిస్తా" అంటూ ఆయన చేసిన రచ్చ వీడియో ఇప్పుడు సోషల్ మీడియాలో వైరల్‌గా మారింది.

ఇప్పుడు ఈ వీడియో చూసిన నెటిజన్లు రకరకాలుగా స్పందిస్తున్నారు. "అదేంటయ్యా నాయనా.. ఓట్లు అమ్ముకోవడం విన్నాం, కానీ ఓడగొట్టి మరీ క్యాష్‌బ్యాక్ అడగడం ఇదే మొదటిసారి" అంటూ సెటైర్లు పేల్చుతున్నారు. నిబంధనల ప్రకారం డబ్బులు పంచడమే నేరం, పైగా తానే స్వయంగా ఆ విషయాన్ని కెమెరా ముందు ఒప్పుకోవడం చూసి పోలీస్ శాఖ(AP Police) ఎలాంటి చర్యలు తీసుకుంటుందో వేచి చూడాలిమరి. ఏది ఏమైనా, ఈ లీడర్ గారి 'డబ్బుల రికవరీ' డ్రామా మాత్రం ప్రస్తుతం రాజకీయ వర్గాల్లో విపరీతమైన చర్చనీయాంశమైంది.