తమిళనాడు రాజకీయాల్లో అనూహ్య పరిణామాలు చోటుచేసుకుంటున్నాయి. రాష్ట్రంలో విజయ్ నేతృత్వంలోని టీవీకే (TVK) ప్రభుత్వం కేవలం ఆరు నెలలు మాత్రమే మనుగడ సాగిస్తుందని డీఎంకే అధినేత, మాజీ ముఖ్యమంత్రి ఎంకే స్టాలిన్ జోస్యం చెప్పారు. ప్రస్తుత పాలనపై ప్రజల్లో తీవ్ర వ్యతిరేకత వ్యక్తమవుతోందని, అపరిమిత వైఫల్యాలతో ఈ సర్కార్ చరమగీతం పాడుకోవడం ఖాయమని ఆయన సంచలన వ్యాఖ్యలు చేశారు.

రాష్ట్రంలో లా అండ్ ఆర్డర్ పూర్తిగా దిగజారిపోయిందని స్టాలిన్ తీవ్ర ఆందోళన వ్యక్తం చేశారు. నిత్యం ఎక్కడో ఒకచోట హింస చెలరేగడం, డ్రగ్స్(Drugs) మాఫియా యథేచ్ఛగా చెలరేగిపోవడం చూస్తుంటే ప్రభుత్వానికి పరిపాలనపై నియంత్రణ పూర్తిగా కోల్పోయినట్లు స్పష్టమవుతోందన్నారు. మహిళలు, చిన్నారులపై జరుగుతున్న అక్రమాలు, నేరాలు రాష్ట్రంలో భయానక వాతావరణాన్ని సృష్టిస్తున్నాయని ఆయన దుయ్యబట్టారు.

గతంలో తమ పాలనను గుర్తుచేసుకుంటూ స్టాలిన్(Stalin) ప్రస్తుత ప్రభుత్వాన్ని ఎండగట్టారు. తాము అధికారంలో ఉన్నప్పుడు ఓటు వేయని వారు కూడా "అయ్యో వీరికి ఓటు వేయలేకపోయామే" అని భావించేలా పరిపాలన అందించామని గుర్తుచేశారు. కానీ నేడు పరిస్థితి పూర్తిగా తలకిందులైందని, ఈ ప్రభుత్వానికి ఓటు వేసిన వారితో పాటు వేయని వారు కూడా "ఎందుకు ఈ చేతకాని పాలనను తెచ్చామా" అని తీవ్రంగా బాధపడుతున్నారని ఆయన పేర్కొన్నారు.

ఇక ఈ సందర్భంగా పరిపాలనాపరమైన వైఫల్యాలు, విపరీతంగా పెరుగుతున్న నిత్యావసరాల ధరలతో అల్లాడిపోతున్న ప్రజలకు అండగా నిలవాలని స్టాలిన్ తన పార్టీ శ్రేణులకు పిలుపునిచ్చారు. విజయ్‌(Vijay) ప్రభుత్వం ఆరు నెలలు కూడా పూర్తిచేసుకోలేని దయనీయ స్థితిలో ఉందని, త్వరలోనే దీనికి చరమగీతం పాడేందుకు డీఎంకే క్యాడర్ సిద్ధం కావాలని ఆయన ఆదేశించారు. అధికార పార్టీ నేతల విమర్శలకు కౌంటర్ ఇస్తూ.. అసలైన దుష్ట శక్తి ఎవరో తమిళనాడు ప్రజలకు ఇప్పటికే పూర్తిగా అర్థమైపోయిందని ఆయన పరోక్షంగా చురకలంటించారు.