విజయ్ దేవరకొండ, రష్మిక మందన్న.. ఈ కాంబినేషన్‌కు టాలీవుడ్‌లోనే కాకుండా పాన్ ఇండియా స్థాయిలో ఉన్న క్రేజ్ గురించి ప్రత్యేకంగా చెప్పాల్సిన పనిలేదు. తెరపై వీరిద్దరి కెమిస్ట్రీకి ఎంతటి ఫాలోయింగ్ ఉందో, వ్యక్తిగతంగా పెళ్లి బంధంతో ఒక్కటైన తర్వాత వారిద్దరూ కలిసి చేస్తున్న మొదటి సినిమా కావడం వల్ల ‘రణబాలి(Ranabaali)’పై అంచనాలు ఒక్కసారిగా ఆకాశాన్ని తాకాయి. 'టాక్సీవాలా'తో మెప్పించిన దర్శకుడు రాహుల్ సంకృత్యాన్ దర్శకత్వంలో తెరకెక్కతున్న ఈ మూవీపై ఇండస్ట్రీలోనూ భారీ చర్చ నడుస్తోంది. అయితే, ప్రస్తుతం ఫిలిం నగర్ సర్కిల్స్‌లో ఈ సినిమా కథ కంటే ఎక్కువగా దీని బడ్జెట్, ముఖ్యంగా హీరో హీరోయిన్ల పారితోషికాల గురించే ఆసక్తికరమైన ముచ్చట సాగుతోంది.

పీరియాడిక్ బ్యాక్‌డ్రాప్‌తో రూపొందుతున్న ఈ భారీ ప్రాజెక్ట్‌ను మైత్రీ మూవీ మేకర్స్ ఎక్కడా కాంప్రమైజ్ కాకుండా నిర్మిస్తోంది. ప్రారంభంలో అనుకున్న బడ్జెట్ ఒకటైతే, మేకింగ్ క్వాలిటీ, విజువల్ గ్రాండియర్ కోసం పెట్టిన ఖర్చుతో అది ఏకంగా రూ.120 కోట్లకు చేరుకున్నట్లు టాక్. ఇందులో సగానికి పైగా బడ్జెట్—అంటే దాదాపు రూ.60 కోట్లకు పైగానే—కేవలం నటీనటులు, సాంకేతిక నిపుణుల రెమ్యునరేషన్లకే సరిపోయిందట. అందులోనూ విజయ్ - రష్మిక(Vijay-Rashmika) జోడీకే సుమారు రూ.30 కోట్ల మేర పారితోషికంగా చెల్లించినట్లు వార్తలు ప్రచారంలో ఉన్నాయి. హిట్ కాంబోకి ఉన్న మార్కెట్ డిమాండ్ దృష్ట్యా నిర్మాతలు కూడా వెనకాడకుండా ఈ రేంజ్ ఆఫర్ చేసినట్లు తెలుస్తోంది.

ఇంతటి భారీ వ్యయం కావడం వల్ల నిర్మాతలకు రిస్క్ అనిపించినప్పటికీ, నాన్-థియేట్రికల్ హక్కుల రూపంలో ఇప్పటికే సగం ఉపశమనం లభించింది. సినిమా సెట్స్ పైకి వెళ్లిన సమయానికే ప్రముఖ ఓటీటీ దిగ్గజం నెట్‌ఫ్లిక్స్(Netflix) డిజిటల్ రైట్స్‌ను దక్కించుకోవడంతో సుమారు రూ.60 కోట్ల వరకు రికవరీ అయ్యిందని సమాచారం. ప్రారంభంలో అనుకున్న రూ.80 కోట్ల పరిమితిలోనే సినిమా పూర్తి అయి ఉంటే, విడుదల ముందే నిర్మాతలు పూర్తి సేఫ్ జోన్‌లోకి వెళ్లేవారు. కానీ పెరిగిన బడ్జెట్ వల్ల ఇప్పుడు మిగిలిన రూ.60 కోట్లను థియేట్రికల్ వసూళ్ల ద్వారా రాబట్టుకోవాల్సి ఉంది.

గతంలో వచ్చిన 'ఇరుముడి' విజయంతో మళ్లీ జోరు పెంచిన మైత్రీ మూవీ మేకర్స్(Mythri Movie Makers), దసరా పండగ సీజన్‌ను గట్టిగా నమ్ముకుంది. పండగ సెలవుల కలిసిరావడం, సినిమాకు పాజిటివ్ టాక్ వస్తే బాక్సాఫీస్ వద్ద రికార్డు వసూళ్లు సాధించడం పెద్ద కష్టమేమీ కాదని మేకర్స్ ధీమాగా ఉన్నారు. మరి విజయ్-రష్మికల క్రేజ్, రాహుల్ మేకింగ్ విజన్ బాక్సాఫీస్ దగ్గర ఎలాంటి మ్యాజిక్ చేస్తాయో, మైత్రీ నమ్మకాన్ని 'రణబాలి' ఎంతవరకు నిలబెడుతుందో చూడాలి.