ప్రస్తుతం పశ్చిమాసియాలో నెలకొన్న ఉద్రిక్త పరిస్థితులు ప్రపంచ దేశాల ఆర్థిక వ్యవస్థలను కలవరపెడుతున్నాయి. ఈ సంక్షోభం కారణంగా చమురు ధరలు పెరిగి, దేశ విదేశీ మారక ద్రవ్య నిల్వలపై ఒత్తిడి పడకుండా ముందస్తు జాగ్రత్తలు తీసుకోవాలని ప్రధాని నరేంద్ర మోదీ(PM Narendra Modi) పిలుపునిచ్చారు. ఈ పిలుపునకు ఆంధ్రప్రదేశ్ ప్రభుత్వం అత్యంత వేగంగా స్పందించడమే కాకుండా, ఆచరణలో సాధ్యమేనని నిరూపిస్తోంది. ముఖ్యమంత్రి నారా చంద్రబాబు నాయుడు నేతృత్వంలోని కూటమి ప్రభుత్వం, ఆడంబరాలకు స్వస్తి పలికి దేశ ఆర్థిక భద్రత కోసం పొదుపు యజ్ఞం ప్రారంభించింది.

ఈ క్రమంలో ముఖ్యమంత్రి చంద్రబాబు నాయుడు(CM Chandrababu Naidu) తన సొంత కాన్వాయ్‌ను 50 శాతం మేర తగ్గించుకుని అందరికీ మార్గదర్శిగా నిలిచారు. గతంలో పదికి పైగా వాహనాలతో వెళ్లే ముఖ్యమంత్రి, నేడు కేవలం నాలుగు వాహనాలతోనే సచివాలయానికి చేరుకోవడం వార్తల్లో హాట్ టాపిక్ గా మారింది. అయితే, వాహనాలు తగ్గించినా భద్రతలో ఎక్కడా రాజీ పడకుండా, తన భద్రతా సిబ్బంది కోసం ప్రత్యేకంగా ఒక బస్సును ఏర్పాటు చేయడం విశేషం. ఇది విలాసాలను తగ్గించుకుంటూనే బాధ్యతను ఎలా నిర్వర్తించవచ్చో చాటిచెప్పేలా ఉంది.

ముఖ్యమంత్రి బాటలోనే ఉప ముఖ్యమంత్రి పవన్ కళ్యాణ్(Pawan Kalyan) సైతం కీలక నిర్ణయం తీసుకున్నారు. తనకు జెడ్ కేటగిరీ భద్రత ఉన్నప్పటికీ, దేశ ప్రయోజనాల దృష్ట్యా తన కాన్వాయ్‌ను కేవలం నాలుగు వాహనాలకే పరిమితం చేసుకోవాలని అధికారులను ఆదేశించారు. అలాగే యువ నాయకుడు, మంత్రి నారా లోకేశ్ కూడా తన కాన్వాయ్‌లో వాహనాల సంఖ్యను సగానికి కుదించి, సిబ్బంది కోసం ప్రత్యేక బస్సును కేటాయించారు. వీరి నిర్ణయాలు కేవలం ప్రకటనలకే పరిమితం కాకుండా, క్షేత్రస్థాయిలో అమలవుతుండటం ప్రజలను ఆకట్టుకుంటోంది.

మంత్రులు అచ్చెన్నాయుడు, నాదెండ్ల మనోహర్(Nadendla Manohar), నిమ్మల రామానాయుడు, అనిత, పయ్యావుల కేశవ్ వంటి వారు కూడా ఈ పొదుపు మంత్రంలో భాగస్వాములయ్యారు. కొందరు మంత్రులు ఎస్కార్ట్ వాహనాలను పక్కన పెట్టి సింగిల్ వాహనాల్లోనే కేబినెట్ భేటీకి హాజరయ్యారు. అంతర్జాతీయ స్థాయిలో ఇంధన ధరల పెరుగుదల వల్ల దేశ ఆర్థిక వ్యవస్థపై భారం పడకుండా ఉండాలంటే, ప్రతి ఒక్కరూ బాధ్యతగా పెట్రోల్, డీజిల్ పొదుపు చేయాలని ముఖ్యమంత్రి పిలుపునిచ్చారు. ప్రభుత్వ యంత్రాంగం చూపిస్తున్న ఈ తెగువ, సామాన్య ప్రజల్లో కూడా అవగాహన కల్పిస్తోంది.