రాష్ట్ర రాజకీయంలో విజయవాడ నగరపాలక సంస్థ (Vijayawada Municipal Corporation) స్థానానికి ఉన్న విశిష్టత వేరు. అధికారం మారినా, వేవ్‌లు మారినా బెజవాడ పీఠంపై జెండా పాతడం ప్రతి ప్రధాన పార్టీకి తీవ్ర సవాలుగానే మారుతుంది. అయితే ఈసారి కార్పొరేషన్ సమరం ముందెన్నడూ లేని విధంగా అత్యంత విచిత్రమైన సమీకరణాలకు వేదికైంది. కూటమి తరఫున రేసులో నిలిచిన ప్రఖ్యాత కాపు నేత వంగవీటి రాధాకృష్ణ ఒకవైపు, వైసీపీ నుంచి మాజీ మేయర్ రాయన భాగ్యలక్ష్మి మరోవైపు ఉంటే.. స్వతంత్ర అభ్యర్థిగా ఎంట్రీ ఇచ్చిన రిటైర్డ్ ఐపీఎస్ అధికారి ఏబీ వెంకటేశ్వరరావు (AB Venkateswara Rao) చుట్టూ ఇప్పుడు అనూహ్యమైన పొలిటికల్ సస్పెన్స్ నడుస్తోంది.   

డిజిటల్ ప్లాట్‌ఫామ్‌లలో చూస్తే ఏబీవీ(ABV) అభ్యర్థిత్వం బెజవాడ రాజకీయాలలో ప్రకంపనలు సృష్టిస్తోందనేలా పెద్ద ఎత్తున ప్రచారం సాగుతోంది. ఐపీఎస్ అధికారిగా ఆయనకున్న అడ్మినిస్ట్రేటివ్ అనుభవం, నగరంపై ఉన్న అవగాహన విద్యావంతులను ఆకట్టుకుంటాయని, ఓ వర్గం సామాజిక వర్గపు ఓట్లను పెద్దఎత్తున కొల్లగొడతారని సోషల్ మీడియా గ్రూపుల్లో సుదీర్ఘ చర్చలు సాగుతున్నాయి. కానీ, నేలమీదికి వచ్చి చూస్తే కథ పూర్తిగా వేరుగా కనిపిస్తోంది. మైకులు పెట్టి, బ్యానర్లు కట్టి బెజవాడ వీధుల్లో ఆయన చేస్తున్న ప్రచార హోరులో జనం కరువయ్యారు. నాయకుడి వెనుక నడిచే బలమైన క్యాడర్ లేకపోవడంతో, ప్రచార సైన్యం పట్టుమని పదిమంది కూడా కనిపించని పరిస్థితి నెలకొంది.   

ఏబీవీ ప్రచార శైలి మరో విచిత్రమైన వైరుధ్యానికి అద్దం పడుతోంది. నగరంలో వామపక్ష (సిపిఎం, సిపిఐ) శ్రేణులు, ఎర్రజెండాలు పట్టుకున్న కొద్దిపాటి కార్యకర్తలే ఆయన వెనుక నడుస్తూ కనిపించడం విశేషం. 'ఇండియా' కూటమి ప్రాతిపదికన కాంగ్రెస్(Congress) పార్టీ నుంచి మద్దతు ప్రకటన వచ్చినప్పటికీ, గ్రౌండ్‌లో కాంగ్రెస్ శ్రేణుల అసలు ముఖమే కనిపించడం లేదు. కాంగ్రెస్‌కు ఇక్కడ కార్యకర్తల బలం లేకపోవడం ఒకెత్తయితే, ఉన్న నాయకులు కూడా క్షేత్రస్థాయి ప్రచారంలో ఏబీవీతో అడుగులు వేయడానికి ఆసక్తి చూపకపోవడం గమనార్హం.   

విజయవాడ ప్రాచీన కాలం నుంచీ మేధోనగరంగా, తటస్థ ఓటర్లకు, విద్యావంతులకు నిలయంగా పేరుగాంచింది. సీనియర్ ఐపీఎస్ అధికారిగా ఉన్న ఏబీవీకి ఈ మేధావి వర్గం, తటస్థ పౌరులు అండగా నిలుస్తారని తొలుత భావించారు. అయితే ప్రచారంలో ఏ ఒక్క సాధారణ పౌరుడు లేదా విద్యావంతుడు స్వచ్ఛందంగా రోడ్డుపైకి వచ్చి మద్దతు తెలపకపోవడం ఏబీవీ క్యాంప్‌లో కలవరాన్ని రేపుతోంది. సోషల్ మీడియాలో వ్యక్తమవుతున్న డిజిటల్ ఆదరణ, వాస్తవ ఓటు బ్యాంకుగా మారుతుందా లేదా కేవలం మైక్ ప్రచారాలకే పరిమితమవుతుందా అనేది ఇప్పుడు బెజవాడ బరిలో హాట్ టాపిక్‌గా మారింది.  మొత్తానికి రాధా(Vangaveeti Radha) విజయం నల్లేరుపై నడకే అనుకున్న దశలో ఏబీవీ తెచ్చిన మార్పు ఓట్ల చీలికకే పరిమితమవుతుందా? లేక ప్రధాన పార్టీల తలరాతలను మార్చే స్థాయికి వెళ్తుందా అన్నది ఎన్నికల ఫలితాలే తేల్చాలి.