జైలు ఊసలు లెక్కబెట్టి వచ్చినా కొందరి నైజం మారదు అనడానికి మాజీ ఎమ్మెల్యే వల్లభనేని వంశీ(Vallabhaneni Vamsi) తాజా శైలే ప్రత్యక్ష నిదర్శనం. ఐదు నెలల పాటు సుదీర్ఘ కాలం పాటు రిమాండ్ ఖైదీగా జైలు జీవితం గడిపి బయటకు వచ్చిన ఆయన, సరిగ్గా అదే పాత పంథాను కొనసాగిస్తుండటం రాజకీయ వర్గాలలో చర్చనీయాంశమైంది. పరిణతితో వ్యవహరించాల్సిన వేళ, మళ్లీ పాత పంచ్ డైలాగులు, వివాదాస్పద హెచ్చరికలతో వార్తల్లో నిలవడం ఆయన రాజకీయ భవిష్యత్తుకే ముప్పుగా మారుతుందనే అభిప్రాయం వ్యక్తమవుతోంది.

గన్నవరం(Gannavaram)లో తెలుగుదేశం పార్టీ కార్యాలయంపై జరిగిన దాడి కేసుకు సంబంధించి చట్టపరమైన ఇబ్బందులు ఎదుర్కొని వంశీ అరెస్ట్ అయ్యారు. ఆ కేసును చట్టబద్ధంగా, న్యాయపరంగా ఎదుర్కొనే అవకాశం ఆయన ముందు పుష్కలంగా ఉంది. కానీ, ఆ మార్గాన్ని ఎంచుకోకుండా  టీడీపి కార్యాలయంలో పని చేసిన సత్యవర్ధన్ అనే ఉద్యోగిని కిడ్నాప్ చేసి హైదరాబాద్‌కు తరలించడం వంటి పరిణామాలు ఆయనను మరింత ఇరకాటంలో నెట్టాయి. నేరుగా కోర్టుల్లో న్యాయ పోరాటం చేయాల్సింది పోయి, ఇలాంటి అడుగులు వేయడం పూర్తిగా స్వయంకృతమేనని విశ్లేషకులు స్పష్టం చేస్తున్నారు. ఇంతటి తీవ్ర పరిణామాలు, జైలు అనుభవాలు ఎదురైనా ఆయన తీరులో ఏమాత్రం మార్పు రాకపోవడం గమనార్హం.

తాజాగా తన అనుచరులతో నిర్వహించిన సమావేశంలో వంశీ(Vamsi) చేసిన వ్యాఖ్యలు ఆయన అతి ఆత్మవిశ్వాసానికి అద్దం పడుతున్నాయి. "నన్ను లోపల వేసినోడిని లోపల వేసింది ఎవరో తెలుసు కదా! నా వెనక ఆయన ఉన్నారు.. ఎవరూ నా చిటికెన వేలు వెంట్రుక కూడా పీకలేరు" అంటూ ఆయన చేసిన వ్యాఖ్యలు కేవలం కార్యకర్తల చప్పట్ల కోసం మాట్లాడిన సినిమా డైలాగులను తలపిస్తున్నాయి. రాజకీయాల్లో ప్రత్యర్థులను రాజకీయంగా ఎదుర్కోవడం వేరు, ఇలాంటి వ్యక్తిగత సవాళ్లు విసరడం వేరు. ఈ తరహా మాటలు ఆయనను రక్షించడం అటుంచి, మరింత కష్టాల్లోకి నెట్టే ప్రమాదం ఉంది.

2029 నాటికి రాజకీయంగా మళ్లీ అధికారంలోకి వస్తామని, అప్పుడు అందరి లెక్కలు తేలుస్తామని వంశీ హెచ్చరించారు. రాబోయే స్థానిక సంస్థల ఎన్నికల్లో(Local Body Elections) తమ అభ్యర్ధులను గెలిపించడం ద్వారా ప్రత్యర్థులకు గట్టి సంకేతం ఇస్తామని ఆయన చెబుతున్నారు. రాజకీయ నాయకులకు కాస్త ఆత్మవిశ్వాసం ఉండటం సహజమే అయినప్పటికీ, క్షేత్రస్థాయి వాస్తవాలను విస్మరించి, కక్షసాధింపు ధోరణితో మాట్లాడటం ఏమాత్రం శ్రేయస్కరం కాదు. ఉన్న కేసుల నుంచి బయటపడటమే ప్రస్తుత తరుణంలో ఆయనకు అత్యంత కీలకం కాగా, తిరిగి కొత్త సమస్యలను కొనితెచ్చుకుంటున్నారనే విమర్శలు వ్యక్తమవుతున్నాయి.మొత్తానికి, గడచిన చేదు అనుభవాల నుంచి పాఠాలు నేర్చుకోవాల్సిన వల్లభనేని వంశీ, మళ్లీ అదే దూకుడు ప్రదర్శిస్తూ పాత తప్పులే పునరావృతం చేస్తుండటం ఆయన రాజకీయ ప్రయాణానికి గొడ్డలిపెట్టుగా మారే అవకాశం ఉంది.