దశాబ్దాల చరిత్ర, కోట్లాది మంది గుండె చప్పుడు.. రాయలసీమకు జీవనాడులైన అనంతపురం, కర్నూలు, కడప జిల్లాల దాహార్తిని తీరుస్తూ, పచ్చని పొలాలకు ప్రాణాధారంగా నిలిచిన అపర భగీరథ ప్రయత్నం ‘తుంగభద్ర డ్యామ్(Tungabhadra Dam)’. అయితే, గత కొంతకాలంగా ఈ ప్రాజెక్టు మనుగడపై నీలినీడలు కమ్ముకున్న వేళ.. సరిహద్దులు దాటిన ఒక అరుదైన మైత్రి, రాజకీయాలకు అతీతంగా సాగిన ఒక మహా సంకల్పం ఇప్పుడు ఈ జలాశయానికి సరికొత్త రూపాన్ని తీసుకొచ్చాయి. కేవలం ఆరు నెలల రికార్డు కాలంలోనే డ్యామ్‌కు 33 కొత్త గేట్లను అమర్చి, ప్రాజెక్టుకు సరికొత్త శోభను చేకూర్చారు. ఇంతకీ ఈ అద్భుత విజయానికి అసలు కారకులు ఎవరు? ఈ ఘనత వెనుక ఉన్న అసలు క్రెడిట్ ఎవరిది?

గతంలో తుంగభద్ర డ్యామ్ 19వ గేటు కొట్టుకుపోయినప్పుడు ఒక్కసారిగా ఇరు రాష్ట్రాల్లోనూ తీవ్ర ఆందోళన వ్యక్తమైంది. కోట్ల క్యూసెక్కుల నీరు వృథాగా పోతుంటే, రైతాంగం గుండెల్లో రైళ్లు పరిగెత్తాయి. ఆ సంక్షోభ సమయంలో పొరుగు రాష్ట్రాల మధ్య ఉండాల్సిన సమన్వయం ఎలా ఉండాలో ఆంధ్రప్రదేశ్ ముఖ్యమంత్రి నారా చంద్రబాబు నాయుడు, కర్ణాటక(Karnataka) యంత్రాంగం నిరూపించారు. సమస్య తీవ్రతను గుర్తించిన ఏపీ ప్రభుత్వం వెంటనే అప్రమత్తమై, కర్ణాటక ప్రభుత్వంతో చేతులు కలిపింది. ముఖ్యంగా అప్పటి కర్ణాటక సాగునీటి శాఖ మంత్రి డీకే శివకుమార్ చూపిన చొరవ, వేగవంతమైన నిర్ణయాలు ఈ సంక్షోభాన్ని అధిగమించడంలో కీలక మైలురాయిగా నిలిచాయి.

"ప్రాజెక్టులు అంటే కేవలం కాంక్రీట్ కట్టడాలు కావు.. అవి ఆధునిక దేవాలయాలు" అనే నెహ్రూ నానుడిని నిజం చేస్తూ, వాటిని కాపాడుకోవడం ప్రతి ప్రభుత్వ బాధ్యత అని చాటిచెప్పారు. కేవలం సమస్యను తాత్కాలికంగా సరిచేసి చేతులు దులుపుకోకుండా.. భవిష్యత్తులో ఇలాంటి ప్రమాదాలు పునరావృతం కాకూడదనే దృఢ సంకల్పంతో అటు కర్ణాటక, ఇటు ఆంధ్రప్రదేశ్(Andhra Pradesh) ప్రభుత్వాలు యుద్ధప్రాతిపదికన చర్యలు చేపట్టాయి. ఫలితంగానే ఆరు నెలల స్వల్ప వ్యవధిలోనే ఏకంగా 33 గేట్లను అత్యాధునిక సాంకేతికతతో పునరుద్ధరించి డ్యామ్‌కు వజ్రపు కవచాన్ని తొడిగారు.

కర్ణాటకలో జరిగిన తుంగభద్ర డ్యామ్ పునరుద్ధరణ కార్యక్రమంలో మూడు రాష్ట్రాల ముఖ్యమంత్రులు ఒకే వేదికపైకి రావడం ఒక చారిత్రాత్మక ఘట్టంగా నిలిచిపోయింది. జల వివాదాలతో రాష్ట్రాలు కోర్టుల చుట్టూ తిరిగే ఈ రోజుల్లో.. నీటి వనరుల పరిరక్షణ కోసం, ప్రజల భవిష్యత్తు అవసరాల కోసం మూడు రాష్ట్రాలు ఒకే తాటిపైకి రావడం దేశ రాజకీయాల్లోనే ఒక సరికొత్త ట్రెండ్‌కు నాంది పలికింది. కాగా, తుంగభద్రకు వచ్చిన ఈ కొత్త శోభ వెనుక ఉన్న క్రెడిట్ కేవలం ఒక్కరిది మాత్రమే కాదు. సంక్షోభ సమయంలో చాకచక్యంగా వ్యవహరించిన చంద్రబాబు నాయుడు(Chandrababu Naidu) నాయకత్వానికి, కర్ణాటక నేతల సమర్థతకు, రెండు రాష్ట్రాల ఇంజనీర్ల శ్రమకు.. అన్నింటికీ మించి అంతర్రాష్ట్ర సహకారానికి దక్కిన సంయుక్త విజయం ఇది.