తెలుగు రాష్ట్రాల విభజన జరిగి దశాబ్దం దాటినా, సరిహద్దుల సెగ మాత్రం ఇంకా చల్లారలేదు. ముఖ్యంగా భద్రాచలం చుట్టుపక్కల ఉన్న ఐదు గ్రామాల విలీనం అంశం మరోసారి తెరపైకి వచ్చింది. తెలంగాణ రాష్ట్ర మంత్రి తుమ్మల నాగేశ్వరరావు(Thummala Nageswara Rao) నేరుగా కేంద్ర హోంమంత్రి అమిత్ షాకు లేఖ రాయడంతో ఇప్పుడు రాజకీయ వర్గాల్లో పెద్ద చర్చ మొదలైంది. అసలు ఆ ఐదు గ్రామాల కథ ఏంటి? మళ్లీ తెలుగు రాష్ట్రాల మ్యాప్ మారబోతోందా?

భద్రాచలం పట్టణానికి ఆనుకుని ఉండి, ప్రస్తుతం ఆంధ్రప్రదేశ్‌(Andhra Pradesh)లో కొనసాగుతున్న ఐదు గ్రామాల విలీనంపై మంత్రి తుమ్మల గట్టి పట్టుబట్టారు. పాలనాపరమైన ఇబ్బందులతో పాటు, స్థానిక గిరిజనులు పడుతున్న అవస్థలను ఆయన తన లేఖలో ప్రధానంగా ప్రస్తావించారు. కేవలం భౌగోళికంగానే కాకుండా, సామాజికంగా, ఆర్థికంగా భద్రాచలంతో ముడిపడి ఉన్న ఈ గ్రామాలను తెలంగాణలో కలపడం ద్వారానే అక్కడ శాశ్వత పరిష్కారం లభిస్తుందని ఆయన స్పష్టం చేశారు.

ప్రస్తుతం ఈ ఐదు గ్రామాల పరిస్థితి అటు ఏపీకి ఇటు తెలంగాణ(Telangana)కు మధ్య ఊగిసలాటలా మారింది. నివసించేది ఏపీ పరిధిలో అయినా, ప్రతి చిన్న అవసరానికి, వైద్యానికి, విద్యా సౌకర్యాలకు భద్రాచలంపైనే ఆధారపడాల్సిన పరిస్థితి. ఈ గందరగోళం వల్ల సంక్షేమ పథకాల అమలులోనూ, అత్యవసర సమయాల్లోనూ గిరిజనులు తీవ్ర ఇబ్బందులు ఎదుర్కొంటున్నారని మంత్రి తుమ్మల వివరించారు. ఈ ఇబ్బందులను తొలగించాలంటే విలీనమే ఏకైక మార్గమని ఆయన వాదిస్తున్నారు.

ఈ విలీనం జరగాలంటే పార్లమెంట్‌లో బిల్లు పాస్ కావాల్సి ఉంటుంది. అందుకే ప్రస్తుతం జరుగుతున్న పార్లమెంట్ సమావేశాల్లోనే ఈ అంశాన్ని చర్చకు తెచ్చి, చట్టపరమైన ప్రక్రియను పూర్తి చేయాలని తుమ్మల కోరారు. అమిత్ షా(Amit Shah)కు రాసిన ఈ లేఖ కేవలం విన్నపం మాత్రమే కాదు, గిరిజనుల దశాబ్దాల కలగా మంత్రి అభివర్ణించారు. మరి ఈ ప్రతిపాదనపై కేంద్ర ప్రభుత్వం ఎలా స్పందిస్తుంది? ఏపీ ప్రభుత్వం దీనిపై ఎలాంటి వైఖరి తీసుకుంటుంది? అనేది ఇప్పుడు ఆసక్తికరంగా మారింది.