అమరావతి: ఆంధ్రప్రదేశ్ రాజకీయ యవనికపై మరో చారిత్రక ఘట్టానికి తెరలేవబోతోంది. గత ఐదేళ్లుగా రాజధాని అనే పదం చుట్టూ అలుముకున్న అనిశ్చితికి శాశ్వత ముగింపు పలికేందుకు కూటమి ప్రభుత్వం ముహూర్తం ఖరారు చేసింది. ఈ నెల 28వ తేదీన రాష్ట్ర అసెంబ్లీ ప్రత్యేకంగా సమావేశం కానుంది. కేవలం ఒక ప్రకటనతో సరిపెట్టకుండా, అమరావతిని ఏపీ ఏకైక రాజధానిగా ఖరారు చేస్తూ అత్యంత కీలకమైన చారిత్రక తీర్మానాన్ని ప్రవేశపెట్టనుంది.

ఈ సమావేశం కేవలం ఒక ప్రకటనకే పరిమితం కాకుండా, అత్యంత వ్యూహాత్మకంగా సాగనుంది. అసెంబ్లీ ఆమోదించే ఈ తీర్మానాన్ని వెనువెంటనే కేంద్ర ప్రభుత్వానికి పంపనున్నారు. విభజన చట్టంలోని అంశాలను సవరిస్తూ, పార్లమెంట్ రికార్డుల్లో ఆంధ్రప్రదేశ్ రాజధానిగా అమరావతిని శాశ్వతం చేసేలా కేంద్రం ద్వారా చట్టపరమైన చర్యలు తీసుకోనున్నారు. దీనివల్ల రేపు ఏ ప్రభుత్వం వచ్చినా మార్చలేని విధంగా రాజ్యాంగబద్ధమైన రక్షణ అమరావతికి లభించనుంది.

అలాగే ఈ చట్టబద్ధమైన క్లారిటీ రావడంతోనే రాజధాని నిర్మాణ పనులు రాకెట్ వేగంతో పుంజుకోనున్నాయి. ఇప్పటికే కేంద్రం ప్రకటించిన రూ. 15,000 కోట్ల ఆర్థిక వెన్నుదన్నుతో పాటు, ప్రపంచ బ్యాంక్ వంటి అంతర్జాతీయ సంస్థల నుంచి నిధుల సేకరణకు ఉన్న టెక్నికల్ అడ్డంకులన్నీ ఈ తీర్మానంతో పటాపంచలు కానున్నాయి. ఐకానిక్ భవనాలు, గ్రిడ్ రోడ్లు, మౌలిక సదుపాయాల కల్పన ఇప్పుడు యుద్ధ ప్రాతిపదికన జరగబోతున్నాయి.

రాజధాని లేని రాష్ట్రంగా ఉన్నామనే ఐదు కోట్ల ఆంధ్రుల ఆవేదనకు ఈ నెల 28వ తేదీ ఒక పరిష్కారం చూపబోతోంది. రాజకీయాలకు అతీతంగా, రాష్ట్ర సర్వతోముఖాభివృద్ధిని అకాంక్షిస్తూ ప్రభుత్వం ఈ నిర్ణయం తీసుకుంది. న్యాయపరమైన వివాదాలకు చెక్ పెడుతూ, పెట్టుబడిదారులకు నమ్మకాన్ని కల్పిస్తూ అమరావతిని వరల్డ్ క్లాస్ సిటీగా తీర్చిదిద్దే ప్రక్రియలో ఇది తొలి, అతి ముఖ్యమైన అడుగు కానుంది.