తెలంగాణ రాష్ట్రంలోని పేద, మధ్యతరగతి విద్యార్థుల చదువులకు ఇక ఆర్థిక ఇబ్బందులు అడ్డుకాకూడదని ప్రభుత్వం కీలక నిర్ణయం తీసుకుంది. 2026-27 వార్షిక బడ్జెట్‌లో భాగంగా విద్యా రంగానికి పెద్దపీట వేస్తూ, రాష్ట్ర ఉప ముఖ్యమంత్రి మల్లు భట్టి విక్రమార్క అసెంబ్లీలో వరాల జల్లు కురిపించారు. ముఖ్యంగా సాంకేతిక విద్యను అభ్యసిస్తున్న యువతకు, కళాశాల విద్యార్థులకు ఈ బడ్జెట్ కొండంత భరోసానిస్తోంది.

పారిశ్రామిక శిక్షణ (ITI) పొందుతున్న విద్యార్థులను ప్రోత్సహించేందుకు ప్రభుత్వం ఒక వినూత్న పథకానికి శ్రీకారం చుట్టింది. ఐటీఐ (ITI) మరియు అడ్వాన్స్‌డ్ టెక్నాలజీ సెంటర్లలో (ATC) శిక్షణ పొందుతున్న ప్రతి విద్యార్థికి నెల‌కు రూ. 2,000 చొప్పున స్కాలర్‌షిప్‌ అందించనున్నట్లు మంత్రి ప్రకటించారు. కేవలం డిగ్రీలకే పరిమితం కాకుండా, వృత్తి విద్యా కోర్సుల వైపు యువతను మళ్లించడం, వారి రోజువారీ ఖర్చుల కోసం ఆర్థికంగా ఆసరా కల్పించడమే ఈ నిర్ణయం వెనుక ఉన్న ప్రధాన ఉద్దేశ్యం.

అదేవిధంగా ఇప్పటివరకు ప్రభుత్వ పాఠశాలల్లో 10వ తరగతి వరకే పరిమితమైన మధ్యాహ్న భోజన పథకాన్ని, ఇకపై ప్రభుత్వ ఇంటర్మీడియట్ విద్యార్థులకు వర్తింపజేయాలని ప్రభుత్వం నిర్ణయించింది. గ్రామీణ ప్రాంతాల నుండి వచ్చే విద్యార్థులు పౌష్టికాహార లోపంతో ఇబ్బంది పడకుండా, పూర్తి ఏకాగ్రతతో చదువుకోవడానికి ఈ నిర్ణయం ఎంతగానో దోహదపడనుంది. కాలేజీ స్థాయి విద్యార్థులకు కూడా ఉచిత భోజనం అందించడం ద్వారా డ్రాపౌట్స్ (చదువు మధ్యలో ఆపేయడం) సంఖ్య తగ్గుతుందని ప్రభుత్వం భావిస్తోంది.

ఇక‌పోతే శారీరక వైకల్యం చదువుకు అడ్డంకి కాకూడదన్న లక్ష్యంతో, దివ్యాంగ విద్యార్థులకు ప్రభుత్వం రెట్రో ఫిట్టెడ్ మోటరైజ్డ్ వాహనాలను ఉచితంగా పంపిణీ చేయనుంది. రవాణా సౌకర్యం లేక ఇంటికే పరిమితమైన ప్రతిభావంతులైన విద్యార్థులకు ఈ వాహనాలు కొత్త రెక్కలను ఇవ్వనున్నాయి. విద్య, ఉపాధి, సామాజిక భద్రత.. ఈ మూడింటి కలయికతో తెలంగాణ ప్రభుత్వం ప్రవేశపెట్టిన ఈ బడ్జెట్ ప్రస్తుతం రాష్ట్రవ్యాప్తంగా యువతలో హర్షాన్ని నింపుతోంది.