ఎన్నికల సమయంలో తమిళనాట రాజకీయం వేడెక్కుతోంది. విజయ లక్ష్మి కోసం అక్కడి రాజకీయ పార్టీలు తమ వ్యూహాలకు పదును పెడుతున్నాయి. తమిళ ప్రజలను ఆకట్టుకునే విధంగా విమర్శలు, ప్రకటనలు, ప్రచారాలు చేస్తున్నాయి. తాజాగా ప్రతిపక్ష అన్నాడిఎంకే ఓ ఇంట్రస్టింగ్ వీడియో రిలీజ్ చేసింది. ఈ వీడియోలో తమిళనాడు సర్కార్ ప్రవేశ పెట్టిన తాత్కాలిక బడ్జెట్ ను ఓ ఆట ఆదుకుంది అన్నాడిఎంకే. బడ్జెట్ పేరుతో ప్రజల చెవులకు పోగులు కుట్టించే కార్యక్రమాన్ని రాష్ట్ర ప్రభుత్వం నిర్వహిస్తుందని ఎద్దేవా చేసింది. 

మంగళవారం ఆర్ధిక మంత్రి తంగం తేన్నరసు తాత్కాలిక బడ్జెట్ ను శాసన సభలో ప్రవేశ పెట్టగా, సభకు అన్నాడిఎంకే ఎమ్మెల్యేలు ఓ వింత ఆహ్వాన పత్రికతో ఎంట్రీ ఇచ్చారు. 'బడ్జెట్ పేరుతో తమిళనాడు ప్రజలకు డీఎంకే ప్రభుత్వం చెవులు కుట్టే కార్యక్రమం నిర్వహిస్తోంది' అని ఆరోపిస్తూ ముహూర్తం కూడా అందులో ప్రచురించారు. తేదీ: ఫిబ్రవరి 17, 2026, స్థలం : తమిళనాడు శాసనసభ, సమయం: ఉదయం 10 గంటల నుండి 'ఈ ఉత్సవానికి ముఖ్యమంత్రి ఎం.కె. స్టాలిన్, చెవులు కుట్టే కార్యక్రమానికి ఆర్థిక మంత్రి తంగం తమరసు నాయకత్వం వహిస్తారని సెటైరికల్ గా ఆహ్వాన పత్రిక రెడీ చేసింది. 

అంతే కాకుండా ప్రజలకు అర్ధమయ్యే రీతిలో ఓ వీడియో కూడా డిజైన్ చేసింది. గత నాలుగున్నరేళ్లుగా ఈ కార్యక్రమాన్ని రాష్ట్ర ప్రభుత్వం అంగరంగ వైభవంగా నిర్వహించిందన్న అన్నాడిఎంకే, ఈ ఏడాది కూడా అదే రేంజ్ లో కార్యక్రమాన్ని నిర్వహించేందుకు సిద్దమైందని తెలుపుతూ వీడియో చేసింది. అధికార డిఎంకే నేతలు ఓ పెద్ద సూది పట్టుకుని ప్రజలకు చెవులు కుట్టేందుకు వారి ఇళ్ళ వెంట తిరుగుతూ ఉంటారు. వారిని చూసి ప్రజలు భయపడి పరుగులు తీస్తున్న వీడియో ఒకటి పోస్ట్ చేసింది. ఈ వీడియో చూసిన వాళ్ళు క్రియేటివిటీకి ఫిదా అయిపోయారు.